მსოფლიო

სომხეთში „სამოქალაქო დაუმორჩილებლობის“ მე-11 დღე მიმდინარეობს

სომხეთში „სამოქალაქო დაუმორჩილებლობის“ მე-11 დღე მიმდინარეობს. ერევანსა და სომხეთის სხვა ქალაქებში მოქალაქეები იკრიბებიან ქვეყნის მოქმედი პრემიერის, სერჟ სარგსიანის გადადგომის მოთხოვნით. გუშინდელ მასშტაბურ მიტინგზე შეკრებილებმა დათქვეს, რომ აქციები დაიწყება დილის 8:15 საათზე, ხოლო საღამოს 7 საათზე ხალხი შეიკრიბება რესპუბლიკის მოედანზე იმის მიუხედავად, ვის და რამდენ ადამიანს დააკავებს პოლიცია.

ასობით დემონსტრანტი ერევნის სხვადასხვა რაიონში ცდილობს ქუჩებისა და მოძრაობის გადაკეტვას. ამით ისინი აპროტესტებენ „სამოქალაქო დაუმორჩილებლობის“ ორგანიზატორების: ნიკოლ პაშინიანის, არარატ მირზოიანისა და სასუნ მიაკელიანის გუშინდელ დაკავებას.

სომხეთის გენერალური პროკურატურის განმარტებით, ოპოზიციონერმა ლიდერებმა დაარღვიეს კანონი „შეკრების თავისუფლების“ შესახებ.

რადიო თავისუფლების სომხური სამსახური პაშინიანის ადვოკატზე დაყრდნობით იუწყება, რომ ოპოზიციონერი ლიდერის ადგილსამყოფელი უცნობია.

კვირის, 19:30 საათის მდგომარეობით პოლიციამ საპროტესტო აქციების 277 მონაწილე დააკავა.