მსოფლიო

სომხეთში პრემიერის ხელახალი არჩევნები 8 მაისს გაიმართება

სომხეთის ეროვნულ კრებაში პრემიერის ხელახალი არჩევნები 8 მაისს გაიმართება. ამის შესახებ ნათქვამია პარლამენტის სპიკერის, არა ბაბლოიანის განცხადებაში.

ცნობისთვის, 1 მაისს ჩატარებულ არჩევნებში პარლამენტის უმრავლესობამ არ დაუჭირა მხარი პრემიერობის ოპოზიციონერ კანდიდატ ნიკოლ პაშინიანს. მან ვერ დააგროვა საჭირო ხმების რაოდენობა (53 ხმა იყო საკმარისი). პრემიერობის ერთადერთ კანდიდატს ეროვნული კრების 45-მა დეპუტატმა მისცა ხმა, ხოლო მმართველი ფრაქცია სომხეთის რესპუბლიკური პარტიის 56-მა წევრმა მას მხარი არ დაუჭირა.

კენჭისყრის შემდგომ პაშინიანმა ერევნის რესპუბლიკის მოედანზე ჩატარებულ მასობრივ მიტინგზე მოუწოდა მხარდამჭერებსა და მოქალაქეებს, დილიდანვე განაახლონ „სამოქალაქო დაუმორჩილებლობის“ საპროტესტო მოძრაობა. 2 მაისს სომხეთის სხვადასხვა ქალაქში ათობით ათასი ადამიანი გამოვიდა, რომელმაც გადაკეტა გზები, სამთავრობო შენობების შესავლელები, ასევე პარალიზებული იყო მეტრო და სარკინიგზო მოძრაობა.

იმავე საღამოს მმართველი ფრაქციის სხდომა გაიმართა, რომელსაც ესწრებოდა ყოფილი პრემიერი სერჟ სარგსიანი. ფრაქციის თამჯდომარემ ვაგრამ ბაღდასარიანმა განაცხადა, რომ საპარლამენტო უმრავლესობა მხარს დაუჭერს კანდიდატს, რომელსაც წარადგენს პარლამენტის მესამედი. მან დაამატა, რომ სომხეთის რესპუბლიკურ პარტიას თავისი კანდიდატი არ ეყოლება.

აღნიშნული განცხადების შემდეგ, 2 მაისს გამართულ მასშტაბური საპროტესტო მიტინგზე პაშინიანმა განაცხადა, რომ მისი კანდიდატურის წარდგენასთან დაკავშირებით ის შეხვედრებს გამართავს ეროვნულ კრებაში, რის გამოც საპროტესტო აქციები დროებით შეწყდება. ოპოზიციონერმა ლიდერმა თავის მომხრეებს მოუწოდა, შეისვენონ.

თუკი 8 მაისს ისევ ვერ აირჩევენ პრემიერ-მინისტრს, სომხეთის პრეზიდენტი იძულებული გახდება, პარლამენტი დაითხოვოს და 30-45 დღის განმავლობაში დანიშნოს ხელახალი საპარლამენტო არჩევნები.