მსოფლიო

სომხეთის ვადამდელ საპარლამენტო არჩევნებზე ნიკოლ პაშინიანის ბლოკმა გაიმარჯვა

სომხეთის ცენტრალური საარჩევნო კომისიის ინფორმაციით, ყველა საარჩევნო უბნიდან მიღებული მონაცემებით, ვადამდელ საპარლამენტო არჩევნებზე პრემიერ-მინისტრის მოვალეობის შემსრულებლის, ნიკოლ პაშინიანის ბლოკმა „ჩემი ნაბიჯი“ გაიმარჯვა. ბლოკს ამომრჩეველთა 70.43%-მა მისცა ხმა.

„ჩემი ნაბიჯის“ გარდა პარლამენტში გავიდნენ გაგიკ ცარუკიანის პარტია „აყვავებული სომხეთი“ 8.27%-ით და ედმონ მარუკიანის პარტია „ნათელი სომხეთი“ (6.37%-ით).

ყოფილმა მმართველმა „სომხეთის რესპუბლიკურმა პარტიამ“ ხმების 4.7% მიიღო, რის გამო პარლამენტის მიღმა დარჩა.

რიგგარეშე საპარლამენტო არჩევნები სომხეთში გუშინ ჩატარდა. სულ არჩევნებზე მივიდა ამომრჩეველთა 48.63% ( 1 260 840 ადამიანი).