მსოფლიო

სომხეთის პრემიერის, ნიკოლ პაშინიანის განცხადებით, ის ყარაბაღის მოსახლეობის სახელით ვერ ილაპარაკებს

სომხეთის პრემიერ-მინისტრმა ნიკოლ პაშინიანმა განაცხადა, რომ მზადაა, ყარაბაღის კონფლიქტის დარეგულირების შესახებ აზერბაიჯანის პრეზიდენტ ილჰამ ალიევს შეხვდეს, თუმცა აღნიშნა, რომ პრობლემის მოგვარება არაეფექტური იქნება, სანამ მოლაპარაკებებში არ ჩაერთვება მთიანი ყარაბაღის ე.წ. ხელმძღვანელობა. ამის შესახებ პაშინიანმა ისაუბრა სამთავრობო პროგრამის წარდგენის დროს.

პაშინიანის განმარტებით, წინა პრეზიდენტებისგან: რობერტ კოჩარიანისგან და სერჟ სარგსიანისგან განსხვავებით, რომლებიც წარსულში ან ხელმძღვანელობდნენ ყარაბაღს, ან მონაწილეობდნენ რეგიონის თავდაცვის ორგანიზებაში, მას არ აქვს უფლება, ყარაბაღის სახელით აწარმოოს მოლაპარაკებები.

„იმავეს უბრალოდ ვერ გავაკეთებ, რადგან საამისოდ არ არსებობს არც უფლებრივი, არც პოლიტიკური და არც მორალური საფუძველი. ყარაბაღის მოსახლეობა არ იღებს მონაწილეობას სომხეთის არჩევნებში, ამის მაგივრად მათ აქვთ თავიანთი მთავრობა და ის უნდა წარადგინოს მხოლოდ საკუთარი ლეგიტიმური ხელისუფლება“, -აღნიშნა პაშინიანმა.

მან დაამატა, რომ ყარაბაღმა უნდა დაიბრუნოს მოლაპარაკებებში სრულუფლებიანი მონაწილის სტატუსი, რაც მინიჭებული ჰქონდა ეუთოს 1994 წლის ბუდაპეშტის სამიტზე, რომელიც ჩამოართვეს 1998 წელს.