მსოფლიო

ქერჩის სრუტეში რუსეთის აგრესიული ქმედებების გამო აშშ სამხედრო გემების გაგზავნას აპირებს - СNN

აშშ შავ ზღვაში სამხედრო გემების გასაგზავნად ემზადება. ამის შესახებ ტელეკომპანია CNN იუწყება აშშ-ის სამ ოფიციალურ პირზე დაყრდნობით.

წყაროების ინფორმაციით, ხომალდების შავი ზღვის აკვატორიაში შესვლა ქერჩის სრუტეში რუსეთის აგრესიულ ქმედებებს უკავშირდება. მათივე ცნობით, სახელმწიფო დეპარტამენტმა უკვე გაუგზავნა შესაბამისი შეტყობინება თურქეთის ხელისუფლებას. თუმცა, СNN-ის კიდევ ერთი წყარო ამტკიცებს, რომ გემების შავ ზღვაში გაგზავნის შესახებ გადაწყვეტილება ჯერ საბოლოოდ მიღებული არ არის.

სახელმწიფო დეპარტამენტსა და ევროპაში დისლოცირებულ აშშ-ის მეექვსე ფლოტში შავ ზღვაში გეგმების გაგზავნის შესახებ ინფორმაციას ამ ეტაპზე არ ადასტურებენ.

ცნობისთვის, 25 ნოემბერს რუსეთის სამხედრო საზღვაო ფლოტის ხომალდებმა უკრაინის კატარღებს ოდესის პორტიდან მარიუპოლის პორტში გადაადგილების დროს ცეცხლი გაუხსნეს. ინციდენტის შედეგად, უკრაინის ექვსი მოქალაქეა დაშავებული. რუსმა მესაზღვრეებმა 24 უკრაინელი სამხედრო დააკავეს. უკრაინამ რუსეთის მოქმედებები აგრესიად შეაფასა. ქვეყნის 10 ოლქში საომარი მდგომარეობა გამოცხადდა.