მსოფლიო

სხვადასხვა ქვეყნის არჩევნებში ჩარევის თავიდან ასაცილებლად ფეისბუკი ახალ რეგულაციებს აწესებს

ფეისბუკის დამფუძნებელმა და აღმასრულებელმა დირექტორმა მარკ ცუკერბერგმა დააანონსა, რომ კომპანია აპირებს, ხელი შეუშალოს ჩარევის მცდელობებს წელს სხვადასხვა ქვეყნის არჩევნებში. ამის შესახებ ცუკერბერგმა თავის გვერდზე დაწერა.

მან აღნიშნა, რომ რუსეთის მიერ 2016 წლის აშშ-ის საპრეზიდენტო არჩევნებში ჩარევის დამტკიცების შემდეგ ფეისბუკმა დაცვის ახალი ინსტრუმენტები დანერგა, რომლებიც წარმატებულად გამოიყენა 2017 წელს საფრანგეთში, გერმანიასა და ალაბამას შტატში ჩატარებულ არჩევნებში. წაიშალა ათი ათასობით ყალბი ანგარიში.

ახალი რეგულაციით, ედვერთაიზერი (პირი, რომელიც სოციალურ ქსელში რეკლამის განთავსებაზე პასუხისმგებელი), რომელსაც სურს პოლიტიკური თუ სარეკლამო განცხადებების გაშვება, უნდა იყოს ვერიფიცირებული (სხვა სიტყვებით, უნდა იყოს შემოწმებული და დამტკიცებული ფეისბუკის ადმინისტრაციის მიერ). ამისათვის ედვერთაიზერმა უნდა დაადასტუროს თავისი ვინაობა და ადგილსამყოფელი. ის, ვინც ვერ გაივლის ვერიფიკაციას, აუკრძალავენ პოლიტიკური თუ სარეკლამო განცხადებების გავრცელებას. ასევე ევდერთაიზერმა უნდა წარადგინონ, ვინ გადაიხადა რეკლამის გაშვებაში.

ცუკერბერგის თქმით, ამ ახალი დამცავი მექანიზმის ტესტირება ხორციელდება კანადაში, ხოლო უკვე ზაფხულისთვის დაინერგება მთელი მსფოფლიოს მასშტაბით.

ფეისბუკი ასევე შეამოწმებს დიდ გვერდებს.

ცუკერბერგის თქმით, პოლიტიკურ ჩარევასთან საბრძოლველად ფეისბუკი აპირებს „ათასობით ადამიანის“ დაქირავებას, რომლებიც ამ პროცესს დააკვირდებიან, რაც გაურთულებს ფეიკ ანგარიშებს ამოფარებულ პირებს სოციალურ ქსელში გვერდების მართვასა და შეაფერხებს დეზინფორმაციის გავრცელებას.

ცნობისთვის, რამდენიმე კვირის წინ ფეისბუკი დიდი სკანდალის ეპიცენტრში აღმოჩნდა. საქმე ეხება კომპანია Cambridge Analytica-ს მიერ, რომელიც დონალდ ტრამპის წინასაარჩევნო შტაბთან თანამშრომლობდა, ფეისბუკის 50 მილიონი მომხმარებლის მონაცემების უკანონო გამოყენებას.