კომენტარი

სხდომის პირდაპირი ეთერით ტრანსლირების დროს არის რისკი იმისა, რომ კონკრეტულმა ადამიანებმა განხილვა შოუდ გადააქციონ - ირაკლი კობახიძე

სხდომის პირდაპირი ეთერით ტრანსლირების დროს არის რისკი იმისა, რომ კონკრეტულმა ადამიანებმა განხილვა შოუდ გადააქციონ - ჩვენ ორიენტირებული ვართ არა შოუზე, არამედ განხილვაზე, - ასე ახსნა პარლამენტის თავმჯდომარემ, ირაკლი კობახიძემ ის ფაქტი, რომ საკონსტიტუციო ცვლილებების დღევანდელი საკომიტეტო განხილვა პირდაპირი ეთერით არ გადაიცა.

მისი თქმით, სხდომების პირდაპირი ეთერით ტრანსლირების პირობებში საგნობრივი მსჯელობის შესაძლობა არ არის და პოლიტიკური ოპონენტები კონსტრუქციულ განხილვაზე მხოლოდ მას შემდეგ გადადადიან, როცა სხდომა იხურება.

“ჩვენ ამ განხილვების დროს ვართ აბსოლუტურად გახსნილი. დღევანდელ სხდომაზე დასწრება შეეძლო ყველას, მათ შორის ჟურნალისტებს. სხდომა იყო აბსოლუტურად ღია. სხდომის ტრანსლირების დროს არის რისკი იმის, რომ კონკრეტულმა ადამიანებმა განხილვა შოუდ გადააქციონ. ჩვენი ამოცანაა, მუხლობრივად, ძალიან დეტალურად განვიხილოთ საკონსტიტუციო ცვლილებები. შესაბამისად, ვართ ორიენტირებული არა შოუზე, არამედ განხილვაზე. დღეს სწორედ ამ ფორმატში ძალიან კონსტრუქციული განხილვა შედგა. ცვლილებებთან დაკავშირებით ძალიან დეტალური მსჯელობა გვქონდა და სრული კონსესუსის საფუძველზე ჩამოყალიბდა საკონსტიტუციო ცვლილებების ის რედაქცია, რომელიც ქვეყნის ტერიტორიულ მოწყობას და ადგილობრივ თვითმმართველობას ეხება. მინდა ასეთ კონსტრუქციულ რეჟიმში გაგრძელდეს განხილვები და სწორედ ამისათვის იქნა მიღებული შესაბამისი გადაწყვეტილება. ყველას შეუძლია ნებისმიერ სხდომაზე დასწრება. მთავარია, მოგვეცეს თითოეული მუხლის კონსტრუქციულად განხილვის შესაძლებლობა“, - განუცხადა ჟურნალისტებს ირაკლი კობახიძემ.

კონსტიტუციაში დაგეგმილი ცვლილებების საპარლამენტო განხილვა დღეს პირდაპირი ეთერით ტრანსლირების გარეშე წარიმართა.

საკონსტიტუციო ცვლილებები პარლამენტის ადგილობრივი თვითმმართველობისა და რეგიონული კომიტეტის სხდომაზე განიხილეს.