მსოფლიო

სირიაში რუსეთის მიერ დაქირავებული 300-მდე მებრძოლი დაიღუპა და დაიჭრა, კრემლი მხოლოდ 5 დაღუპულზე საუბრობს - როიტერსი

7 თებერვალს, სირიაში აშშ-ის ხელმძღვანელობით მოქმედი დასავლური კოალიციის იერიშის შედეგად დაიღუპა და დაიჭრა კრემლთან დაკავშირებული სამხედრო კომპანია „ვაგნერის“ 300-მდე დაქირავებული მებრძოლი. ინფორმაციას როიტერსი სამ წყაროზე დაყრდნობით ავრცელებს.

ერთ-ერთი წყარო რუსი სამხედრო ექიმია, რომლის ინფორმაციით, დარტყმის შედეგად „ვაგნერის“ მიერ დაქირავებული 100 სამხედროს სიცოცხლე ემსხვერპლა, მეორე წყარომ კი 80 დაღუპულზე ისაუბრა.

დაქირავებული მებრძოლეები სირიის პრეზიდენტ, ბაშარ ალ-ასადის მხარეს იბრძოდნენ.

5 წყაროზე დაყრდნობით როიტერსი იუწყება, რომ დაჭრილი მეომრები 4 სხვადასხვა რუსულ ჰოსპიტალში გადაიყვანეს. მოსკოვის სამხედრო ჰოსპიტალში მომუშავე სამხედრო ექიმის ინფორმაციით, ის უშუალოდ იყო ჩართული სირიიდან ევაკუირებული მეომრების მკურნალობაში. მისი თქმით, შაბათ საღამოს ჰოსპიტალში 50 პაციენტზე მეტი იმყოფებოდა, აქედან 30% სერიოზულად იყო დაჭრილი.

რუსეთის საგარეო უწყების სპიკერმა, მარია ზახაროვამ დაადასტურა რუსეთის 5 მოქალაქის დაღუპვის ფაქტი, თუმცა უარყო მათი კავშირი რუსეთის შეიარაღებულ ძალებთან. მან აღნიშნა, რომ ინფორმაცია ათობით ან ასობით დაშავებული თუ დაღუპული მეომრების შესახებ რუსეთის ოპონენტების მიერ შემოგდებული დეზინფორმაციაა.

ანა მებურიშვილი