კომენტარი

სირიაში კანონიერი პრეზიდენტია და მისი მოსპობა სურთ, როგორც კადაფი მოსპეს - ემზარ კვიციანი

პატრიოტთა ალიანსი ნაციონალური მოძრაობის მიერ ინიცირებულ განცხადებას, რომელიც ალეპოში მიმდინარე მოვლენებს გმობს - მხარს არ დაუჭერს.

ამის შესახებ მედიას პარლამენტის თავდაცვისა და უშიშროების კომიტეტის წევრმა ემზარ კვიციანმა განაცხადა.

კვიციანის თქმით, სირიაში ლეგიტიმური პრეზიდენტია და მისი მოსპობა სურთ, ისევე როგორც ლიბიის ლიდერი მუამარ კადაფი მოსპეს.

„რა თქმა უნდა, ვერ შევუერთდები, მით უმეტეს, ნაციონალური მოძრაობის იდეას. ნაციონალურ მოძრაობას ჯობდა ეს, ხუთი წლის წინ გაეკეთებინა, როდესაც სირიაში ეს უბედურება დაიწყო. მე მახსოვს ნაციონალები ამბობდნენ, რომ კანონიერი ხელისუფლების ხელის შეხება არ შეიძლება. იქ არის კანონიერი ხელისუფლება. როგორც კადაფი მოსპეს, ისე ასადის მოსპობა მოინდომეს, არ გამოუვიდათ ეს და დღემდე, ხუთი წელიწადია იქ სისხლი იღვრება. რა თქმა უნდა, ჩვენ ყველა წინააღმდეგი ვართ. ბავშვები იხოცებიან იქ და ეს არის საშინელება“,-აღნიშნა დეპუტატმა.

მონიკა დავლიანიძე