კომენტარი

შუახევის საჯარო სკოლის მასწავლებლისთვის სულ მცირე, საყვედური იქნება გათვალისწინებული - მარიამ ჯაში

პარლამენტის განათლების კომიტეტის თავმჯდომარის, მარიამ ჯაშის თქმით, შუახევის სკოლის პედაგოგი სულ მცირე საყვედურს მიიღებს.

მისი თქმით, მას საკითხზე აჭარის განათლების მინისტრთან და პარტიის მმართველ გუნდთან აქვს კომუნიკაცია.

„ჩვენი ინფორმაციით, აღნიშნული პედაგოგი „ქართული ოცნების“ აქტივისტი არ არის და დასადგენია, რეალური მოტივები, რატომ აღმოჩნდა „ქართული ოცნების“ დროშები დაწყებითი კლასის მოსწავლეებთან. ქვეყანაში რაც არ უნდა პოლიტიკური პროცესი მიმდინარეობდეს, არცერთ პოლიტიკურ ძალას არ აქვს უფლება, სკოლაში პოლიტიკა შეიტანოს.

აღნიშნული საქმე დისციპლინარულ კომიტეტს გადაეცა. ჩვენი ხელისუფლების პირობებში, საგანმანათლებლო სისტემის დეპოლიტიზაცია მოხდა და ჩემი საარჩევნო კამპანიის დროს, სკოლებში შეხვედრა არ ყოფილა. კონკრეტულ ფაქტთან მიმართებით დასადგენია კონკრეტული გარემოებები და მოტივები. პედაგოგისთვის, სულ მცირე, საყვედური იქნება გათვალისწინებული, მაგრამ კომიტეტის გადაწყვეტილებას დაველოდოთ“,-განმარტა ჯაშმა.

სოციალურ ქსელში გავრცელდა ფოტო, რომელზეც შუახევის საჯარო სკოლის პირველკლასელები მერხთან სხედან და „ქართული ოცნების“ დროშები უჭირავთ.

მონიკა დავლიანიძე