კომენტარი

შსს რა დასკვნასაც დადებს, მაინც პროკურატურამ უნდა განიხილოს და რა აზრი აქვს ამ ყველაფერს, ვეღარ ვხვდები - ზაზა სარალიძე

შსს-ში ხორავას ქუჩაზე მოკლული დავით სარალიძის მამის, ზაზა სარალიძის გამოკითხვა დასრულდა.

სარალიძის თქმით, მან ყველა იმ დეტალზე ისაუბრა, რაც იცის, ხოლო თუ რამე გაახსენდება, აცუილებლად მიაწვდის ინფორმაციას გამოძიებას.

„ვისაუბრეთ აბსოლუტურად ყველა დეტალზე, მაგრამ თუ კიდევ გამახსენდა რამე ისეთი დეტალი, რომელზეც არ გვისაუბრია, მოვბრუნდები ისევ უკან და მაქსიმალურად მივაწვდი ინფორმაციას. სისხლიან ტანსაცმელზე წინა გამოკითხვაზე ვისაუბრე. დღეს ასევე გვქონდა საუბარი ფარდულთან დაკავშირებითაც. გარდა ამისა, გამოფრქვეული სისხლის მიმართულებებითაც, რომელიც არ იყო აღწერილი ექსპერტიზაში, ანუ ფაქტობრივად, განადგურებულია. ამას ხელახლა ვერავინ დაადგენს", - უთხრა სარალიძემ ჟურნალისტებს.

სარალიძის თქმით, საკითხავია, რა აზრი აქვს შსს-ის გამოძიებას, თუკი მათ მიერ მოზადებულ დასკვნას ისევ პროკურატურამ უნდა განიხილოს.

„პასუხებს ჯერ ვერაფერზე მცემენ იქიდან გამომდინარე, რომ ეს არის დაკითხვის პროცესი. სასამართლო ჩვენებებიც არ არის გადმოგზავნილი ჯერ ამათთან. ჯერ რაზე უნდა იმსჯელონ, ისიც არ ვიცი. მხოლოდ და მხოლოდ წინასაგამოძიებო ჩვენები აქვთ. სასმართლო პროცესის ჩვენებები არ აქვთ. ჯერჯერობით ფაქტია, რომ პროკურატურის ხაზს მიჰყვებიან, მაგრამ მინდა აღვნიშნო, ყველაზე მეტი უბედურება ის არის, რომ ესენი რა დასკვნასაც დადებენ, მაინც პროკურატურამ უნდა განიხილოს და რა აზრი აქვს ამ ყველაფერს, ვეღარ ვხვდები“, - განაცხადა სარალიძემ.