კომენტარი

შეუძლებელია ომის დაწყებაში დაადანაშაულო სააკაშვილი და არ დაადანაშაულო საქართველო - დავით ზურაბიშვილი

„რესპუბლიკელი“ დავით ზურაბიშვილი სოციალურ ქსელში აგვისტოს ომის შესახებ სტატუსს წერს.

,,ომი საქართველომ კი არა მიშამ დაიწყოო, ვინც გაიძახით და გულწრფელად აღშფოთებულები ხართ, რა შუაშია ქვეყანა, როცა სააკაშვილზე ვუბნობთო.

რამდენიმე უმარტივესი კითხვა მაქვს თქვენთან:

მეორე მსოფლიო ომი გერმანიამ დაიწყო თუ ჰიტლერმა?

ავღანეთში ომი საბჭოთა კავშირმა დაიწყო თუ ბრეჟნევმა?

ჰიროსიმაში ატომური ბომბი ამერიკამ ჩამოაგდო თუ ტრუმენმა?

საერთაშორისო ურთიერთობებში და მით უმეტეს ომის დროს ქვეყანა და მისი ხელისუფლება რომ ერთი და იგივეა, ამის გაცნობიერება ეტყობა გიჭირთ ცოტა. როგორც ჩანს, ასევე გიჭირთ იმ ელემენტარული ჭეშმარიტების გააზრება, რომ ყოველი შემდგომი ხელისუფლება პასუხისმგებელია მისი წინამორბედი ხელისუფლების ქმედებებზე და ეს არის სახელმწიფოებრიობის ერთ-ერთი ფუნდამენტური პრინციპი.

იგივე გერმანიამ მეორე მსოფლიო ომის შედეგად ტერიტორიები დაკარგა და საერთოდ ორად გაყვეს. ეს რეალობა გერმანიის ფედერაციული რესპუბლიკის იმდროინდელ ხელმძღვანელობას სულ არ უხაროდა, მაგრამ კანცლერ ადენაუერს, ნაციზმის დროს რეპრესირებულ ანტიფაშისტს, ის კი არ უთქვამს: გერმანია რა შუაშია, ეგ ჰიტლერი იყო ჰოლოკოსტს რომ აწყობდა, თორემ მე ციხეში ვიჯექი მის დროსო.

ამიტომაც შეუძლებელია ომის დაწყებაში დაადანაშაულო სააკაშვილი და არ დაადანაშაულო საქართველო. შეუძლებელია ომის დაწყებაზე პასუხისმგებლობა დაეკისროს წინა ხელისუფლებას ისე, რომ სერიოზულად არ დაზარალდეს ქვეყანა ამ ხელისუფლების დროს. გაიგეთ ეს ერთხელ და სამუდამოდ და შეუშვით თქვენს ტვინებში თუ დაგრჩათ რაიმე პატრიოტიზმის მსგავსი გრძნობა მაინც. თუ არა და როგორც თქვენი საყვარელი რუსები იტყოდნენ: "Бог вам судья и Саломе Зурабишвили президент!" - წერს დავით ზურაბიშვილი.