კომენტარი

შეთავაზებასთან დაკავშირებით გადაწყვეტილება კონსულტაციის საფუძველზე იქნება მიღებული - ანა დოლიძე

პრეზიდენტის საპარლამენტო მდივნის, ანა დოლიძის შეფასებით, დოკუმენტი, რომელიც უნდა უძლებდეს საუკუნეებს, ვერ უძლებს საათებს.

მისი თქმით, მიღებიდან რამდენიმე საათში ითხოვენ შეიცვალოს ის საკონსტიტუციო ცვლილებები, რომელიც პარლამენტმა მიიღო.

ასე გამოეხმაურა დოლიძე პარლამენტის თავმჯდომარის შეთავაზებას პრეზიდენტისადმი, რომლის მიხედვით, ირაკლი კობახიძემ გიორგი მარგველაშვილს კონსტიტუციაში შესატან ცვლილებებზე ვეტოს გამოყენება და მხოლოდ იმ შენიშვნების ასახვა შესთავაზა, რომელიც გაუნაწილებელი მანდატების ბონუსების სისტემის გაუქმებასა და ერთჯერადად ბლოკების შენარჩუნებას ეხება.

ანა დოლიძის თქმით, შეთავაზებასთან დაკავშირებით გადაწყვეტილება მათ შორის „ქართულ ოცნებასთან“ კონსულტაციის საფუძველზე იქნება მიღებული.

„უნდა დავფიქრდეთ რა ვითარებასთან გვაქვს საქმე. დოკუმენტი, რომელიც უნდა უძლებდეს საუკუნეებს, ვერ უძლებს საათებს. მიღებიდან რამდენიმე საათში გვთხოვენ შევცვალოთ ის საკონსტიტუციო ცვლილებები, რომელიც პარლამენტმა მიიღო. ეს ვითარება სამწუხაროა და წარმოუდგენელია ასეთი მნიშვნელობის დოკუმენტთან მიმართებაში. თუმცა, ჩვენ როგორც პასუხისმგებლობის მქონე ინსტიტუტი, ბუნებრივია, გავმართავთ კონსულტაციებს მათ შორის „ქართულ ოცნებასთან“ და სხვადასხვა პოლიტიკურ ძალებთან, რადგან პასუხისმგებლობით ვეკიდებით ამ ჩიხური მდგომარეობიდან გამოსვლის შესაძლებლობას“,- განაცხადა დოლიძემ.

მონიკა დავლიანიძე