კომენტარი

შეხვდა თუ არა რუსთავის მერი პორტუგალიაში კრიმინალურ ავტორიტეტს

ერთ-ერთი მედიასაშუალებით კიდევ ერთხელ გაიჟღერა შეთხზული ამბის ახალმა ინტერპრეტაციამ, რაზეც აუცილებლად მექნება სამართლებრივი რეაგირება ჩემი პატივისა და ღირსების დასაცავად, - ამის შესახებ ნათქვამია რუსთავის მერის, ირაკლი ტაბაღუას განცხადებაში, რომელიც მის ოფიციალურ „ფეისბუქგვერდზე“ გამოქვეყნდა.

„ბოლო პერიოდში ჩემს მიმართ დაწყებული ბინძური კამპანია, რომელშიც მაქსიმალურად ვცდილობდი, არ ჩავრთულიყავი და არ გამეკეთებინა არარსებულ ამბებზე კომენტარი, პირდაპირ კავშირშია სხვადასხვა პოლიტიკური ძალების ინტერესებთან, რომელთა მიზანიც რუსთავის კეთილდღეობის და წინსვლის შეჩერებაა.

ჩემი სახელის დისკრედიტაციით და გამოგონილი ამბებით, ცდილობენ ზიანი მიაყენონ მმართველი გუნდის ერთიანობას, დაბნეულობა გამოიწვიონ საზოგადოებაში და რუსთავის თვითმმართველობის მიმართ მოსახლეობის ნდობის ხარისხი შეამცირონ.

დღეს ერთ-ერთი მედიასაშუალებით კიდევ ერთხელ გაიჟღერა შეთხზული ამბის ახალმა ინტერპრეტაციამ, რაზეც აუცილებლად მექნება სამართლებრივი რეაგირება ჩემი პატივისა და ღირსების დასაცავად. ვინაიდან ბოლო ამბის ინსპირაცია ჩემი პორტუგალიაში ვიზიტი გახლავთ, მისი მნიშვნელობიდან გამომდინარე ჩავთვალე საჭიროდ, მხოლოდ ამ ნაწილში ვუპასუხო საზოგადოებას და არა მედიასაშუალებას, რომელიც ჭორებს ავრცელებს.

პორტუგალიაში ჩემი ვიზიტი იყო გაეროს მიერ ორგანიზებული, სადაც სერბეთის, მოლდავეთის, ლიბანის, პორტუგალიის, ტაჯიკეთისა და ხორვატიის ადგილობრივი თვითმმართველობების წარმომადგენლებთან ერთად ხელი მოვაწერე ქარტიას, რომელიც მზის ენერგიის სისტემების განთავსების ხელშეწყობას, ასევე, მზის ენერგიის სისტემების განვითარებაში სამოქალაქო სექტორისა და ბიზნესის ჩართულობის გაზრდას ითვალისწინებს”, - ნათქვამია განცხადებაში.

ერთ-ერთმა მედიასაშუალებამ გაავრცელა ინფორმაცია, რომ პირად პრობლემებზე სასაუბროდ, რუსთავის მერი პორტუგალიაში კრიმინალურ ავტორიტეტს შეხვდა.