კომენტარი

სესხის ლარში გადაყვანისას ადამიანებს პროცენტი გაეზრდებათ - რომან გოცირიძე

ნაციონალური მოძრაობის წევრის რომან გოცირიძის განცხადებით, მთავრობამ ხალხი, საპარლამენტო უმრავლესობა და უმცირესობა მოატყუა.

როგორც გოცირიძემ პარლამენტის სესიაზე აღნიშნა, პრემიერ-მინისტრს რამდენიმე დღის წინ, პარლამენტში გამოსვლის დროს არაფერი უთქვამს იმაზე, რომ გადასახადების მომატებას აპირებდა.

„ფაქტობრივად, მთავრობამ მოატყუა ხალხი, მოგვატყუა ჩვენ და მოგატყუათ თქვენ - უმრავლესობა. აქ არც ერთი სიტყვით არ იყო საუბარი იმის თაობაზე, რომ თურმე აპირებენ გადასახადების მომატებას. რომ სულ მალე მოიმატებს გადასახადები ავტომობილების იმპორტზე, აქციზზე, გაძვირდება საწვავი, რასაც მოჰყება გაძვირება ფაქტობრივად ყველა სახის საქონლისა, რაც კი პირდაპირ თუ ირიბად სწორედ საწვავის ფასებთან არის დაკავშირებული. ხელისუფლებას აქ არ უთქვამს, რომ დაუწესებდა ადამიანებს სესხის აღებას უცხოურ ვალუტაში და გაუქმებდა ონლაინ სესხების სისტემას. მოგვწონს თუ არ მოგწვონს, სხვა საკითხია. და რაც ყველაზე მთავარია, ხელისუფლებას აქ არ უთქვამს, რომ ჩვენი ჯიბიდან აპირებს ვიღაცის ვალების გასტუმრებას“,-აღნიშნა გოცირიძემ.

მისი თქმით, უცხოურ ვალუტაში სესხის მქონე ადამიანებისთვის, მათი ლარში გადაყვანა არ იქნება ამ ადამიანებისთის მდგომარეობის შემსუბუქება.

„ამ ადამიანებისთვის არავითარი შემსუბუქება ვერ იქნება, ვინაიდან ლარში გადაყვანისას პროცენტი გაეზრდება და იმ შემთხვევაში, თუ ლარი გამყარდება, მათ უკვე მოუწევთ გაცილებით დიდი საგადასახადო ტვირთის ზიდვა. თუ გგონიათ და აპირებთ, რომ ლარი არ გამყარდეს? თუ თქვენ შეეგუეთ იმას, რომ ლარი დარჩება 2,53 ან წავა წინ, მაშინ ეს იქნება კატასტროფული ეკონომიკისათვის“,-აღნიშნა გოცირიძემ.

მონიკა დავლიანიძე