კომენტარი

საშემოდგომო სესიის დაწყების პირველსავე დღეს ვთქვი, რომ ქვეყანაში არის კორუფცია - ნატო ჩხეიძე

იბერია ტვ-ს დამფუძნებელი ნატო ჩხეიძე ტელეკომპანიასთან დაკავშირებით დღეს გავრცელებულ მესამე აუდიოჩანაწერს გამოეხმაურა და საკითხის კომენტირებისას ,,საერთაშორისო გამჭვირვალობა - საქართველოს“ ხელმძღვანელის, ეკა გიგაურის განცხადება გაიხსენა.

,,ჩემი აზრით, საქმე გვაქვს იმასთან, რაც უკვე თქვა ეკა გიგაურმა, რომ ქვეყანაში არის ტოტალური კორუფცია.

პირადად მე, საშემოდგომო სესიის დაწყების პირველსავე დღეს ვთქვი სწორედ ის, რაც დღეს ქალბატონმა ეკამ ბრძანა, რომ ქვეყანაში არის კორუფცია. მაშინაც შეეძლოთ ეკითხათ შესაბამის სტრუქტურებს, თუ რატომ ვამბობდი ამას და რასთან გვქონდა საქმე“, - განაცხადა ნატო ჩხეიძემ.

რაც შეეხება კითხვას, თუ დღეს გავრცელებულ ჩანაწერში რომელ პრემიერზეა საუბარი და არის თუ არა ეს, მამუკა ბახტაძე, ჩხეიძე არ აკონკრეტებს.

,,მე ზუსტად ვერ გეტყვით მაგას. ერთი ის ვიცი, რომ ამ ორი წლის განმავლობაში სამჯერ გაჩერდა ფაბრიკა და სამჯერვე ასეთ საუბრებს ჰქონდა ადგილი. შესაბამისად, მე ზუსტად ვერ ვიტყვი, რომელ პრემიერზეა საუბარი“, - განაცხადა ნატო ჩხეიძემ.