კომენტარი

საქართველოში არის მიწის მცირე რესურსი, ის უნდა იყოს დაცული და არ შეიძლება მისი განიავება - თეა წულუკიანი

იუსტიციის მინისტრმა, თეა წულუკიანმა სასოფლო-სამეურნეო მიწების უცხოელებზე გასხვისების საკითხთან დაკავშირებით კომენტარი გააკეთა.

„სასოფლო სამეურნეო მიწები არ უნდა გაიყიდოს იმ უცხოელებზე, რომლებიც იმ მიზეზის გამო ჩამოდიან ხანდახან საქართველოში, რომ შეჭირვებული ქართველისგან შეიძინონ მიწა და გამოკვებონ თავიანთი ოჯახები. ან მხოლოდ იმიტომ, რომ საკუთარ ქვეყანაში არ აქვთ საკმარისი მიწა, რომ მოიყვანონ კარტოფილი ან თუნდაც სიმინდი. ასეთ უცხოელებზე არ უნდა გაიყიდოს მიწა.

ახლა ბანკებს აქვთ პრობლემები და საბანკო საქმიანობის ხელშეწყობისთვის, იმისთვის რომ საქართველოში მომუშავე ბანკებმა არ გააჩერონ თავიანთი საქმიანობა „ქართული ოცნების“ მიერ დაგეგმილ მორატორიუმში მცირედი ცვლილება შევიდა. ეს ცვლილება გულისხმობს, რომ თუკი ქართველ გლეხს დასჭირდება საქართველოში მოქმედ ბანკში ჩადოს თავისი მიწა და მიიღოს სესხი, ბანკმა შეძლოს დროებით ასეთი ქონება დაისაკუთროს, მაგრამ ბანკს აეკრძალება ეს მიწა უცხოელებზე გაიყიდოს. ამიტომ წმინდა წყლის სპეკულაციებია, როცა აცხადებენ, რომ ეს ცვლილება მორატორიუმში რამეს ცვლის.

საქართველოში არის მიწის მცირე რესურსი, ის უნდა იყოს დაცული და არ შეიძლება მისი განიავება“, - ამბობს თეა წულუკიანი.

ნინო ექვთიმიშვილი