მსოფლიო

საქართველოს შესახებ ევროპარლამენტის მიერ მომზადებული ანგარიში, შესაძლოა, გამკაცრდეს

საქართველოს შესახებ ევროპარლამენტის მიერ მომზადებული ანგარიში, შესაძლოა, გამკაცრდეს, რადგან მას ორი კრიტიკული ჩანაწერი დაემატება, რომლებიც ეხება ხელისუფლების ზეწოლას „რუსთავი 2“-ზე და ბიძინა ივანიშვილი არაფორმალურ მმართველობას.

სავარაუდოდ, ანგარიშის ბოლო ვერსიას კიდევ ერთ შენიშვნას დაუმატებენ, რომელიც ქვეყანაში სამართლიანი სასამართლოს არარსებობასა და მართლმსაჯულების კრიზისს უკავშირდება.

დოკუმენტის საბოლოო რედაქცია ევროპარლამენტმა რამდენიმე საათში უნდა მიიღოს.

ანგარიშის საბოლოო რედაქციის მიღებამდე ევროპარლამენტარებს საქართველოს პარლამენტის ოპოზიციონერი დეპუტატები ხვდებოდნენ.

„საქართველოს დღევანდელ ხელისუფლებას უნდა ესმოდეს, რომ ყოველთვის, როდესაც არღვევს სწორედ იმ ვალდებულებებს, რომლებიც აღებული აქვს დემოკრატიული სისტემის შექმნის თვალსაზრისით, როგორც ევროკავშირთან ასოცირების ხელშეკრულების ხელმომწერ მხარეს, ის ამით საფრთხე შეუქმნის ქვეყნის ევროპულ მომავალს.

სწორედ ამიტომ, ბევრი შეკითხვა არსებობს და ბევრი შესწორებები შედის ამ ანგარიშში“, - განაცხადა „ნაციონალური მოძრაობის“ წევრმა სალომე სამადაშვილმა.

„ევროპული საქართველოს“ დეპუტატის, გიორგი კანდელაკის განცხადებით, საქართველოს ხელისუფლებამ პასუხი უნდა გასცეს მთავარ შეკითხვას, რატომ არის რადიკალური პრორუსული პარტიის სახე ანდრეი მამიკინსი „ქართული ოცნების“ მთავარი მოკავშირე ევროპარლამენტში.
ევროპარლამენტარი მამიკინსის განცხადებით, მას ორი დახურული შეხვედრა ექნება მთავარ მომხსენებლებთან. მისი ვარაუდით, ანგარიშთან დაკავშირებით ოქტომბერში დებატები გაიმართება, რის შემდეგაც ევროპარლამენტარები ანგარიშს კენჭს უყრიან.