კომენტარი

საქართველოს რკინიგზა ხელოვნურად ქმნის ბარიერს - მესამე სექტორი და საექსპედიციო კომპანიები საქართველოს რკინიგზას კორუფციაში ადანაშაულებენ

არასამთავრობო ორგანიზაციებმა და საექსპედიტორო კომპანიებმა საქართველოს რკინიგზა კორუფციასა და მონოპოლიების მფარველობაში დაადანაშაულეს.

კერძო კომპანიების განცხადებით, მათ ნავთობპროდუქტების გადაზიდვისთვის რკინიგზასთან შესაბამისი ხელშეკრულება აქვთ გაფორმებული, შემოტანილი აქვთ ნედლეულიც, თუმცა მის შემდგომ ტრანსპორტირებაში რკინიგზა ხელს უშლის.

მათი თქმით, მონოპოლიას პეტროკასი, „რონსეფტის“ შვილობილი კომპანია, და ასევე „ლუკოილი“ მფარველობენ.

სამოქალაქო სექტორისა და კერძო კომპანიების წარმომადგენელების განცხადებით, ჩამოთვლილი ორი კომპანიის გარდა რკინიგზა მუშაობის საშუალებას არავის არ აძლევს.

„დღეს საქართველოს რკინიგზა ღრმა კორუფციაშია და ჩვენ არაერთხელ გავასაჯაროებთ კონკრეტული ფაქტები, თუ როგორ ახდენდა საქართველოს რკინიგზა ხელოვნური ბარიერების შექმნით კონკურენციის შეზღუდვას, მონოპოლიის ხელშეწყობას. არაერთხელ დავადასტურეთ, რომ ეს ყველაფერი უკავშირდებოდა კორუფციულ გარიგებებს. სამწუხაროდ, ჩვენ დღეს, ჩვენი ქვეყანა იმყოფება ორ პარალელურ სამყაროში“,- განაცხადა ტრანსპორტის საკითხებზე მომუშავე პლატფორმა ”ჰაბ ჯორჯიას” აღმასრულებელმა დირექტორმა ვასო ურუშაძემ.

ტრანსპორტის საკითხებზე მომუშავე პლატფორმა „ჰაბ ჯორჯიას“ გამგეობის თავმჯდომარის, ლაშა ფარულავას თქმით, კომპანია სიტუაციაში გასარკვევად რკინიგზასთან დაკავშირებას ცდილობდა, თუმცა უშედეგოდ.

„სექტემბრისა და ოქტომბრის თვეების განავლობაში არანაირი კონტაქტი, მათ შორის არცერთ წერილზე, ათობით წერილი გვაქვს გაგზავნილი საქართველოს რკინიგზასთან, თუმცა არანაირი პასუხი დღემდე არ მიგვიღია, რაც კიდევ ერთხელ ადასტურებს იმას, რომ საქართველოს რკინიგზა , კონკრეტულად გადაზიდვების ფილიალი, ხელოვნურად ქმნის ბარიერს და კომპანიებს, ამ შემთხვევაში ჩვენს კომპანიას არ გვაძლევს საშუალებას, რომ რკინიგზის დახმარებით ტვირთი გადავზიდოთ და გვაყენებს ძალიან მძიმე მდგომარეობაში, იქიდან გამომდინარე , რომ ჩვენ გვაქვს აღებული ვალდებულებები სომხურ კომპანიასთან და ამ ვალდებულებების შეუსრულებლობის გამო, რა თქმა უნდა, ამ კომპანიასთან გვექნება ფინანსური პრობლემები“, -აღნიშნა ფარულავამ.