მსოფლიო

საქართველოს პოლიტიკური გადაწყვეტილებები ხელს უწყობს სოხუმთან და ცხინვალთან ურთიერთობების გამწვავებას - რუსეთის საგარეო უწყება

მოსკოვში რუსეთის საგარეო საქმეთა მინისტრის მოადგილე, გრიგორი კარასინი ევროკავშირის სპეციალურ წარმომადგენელს, ჟენევის დისკუსიების თანათავმჯდომარეს ტოივო კლაარს შეხვდა. მათ ისაუბრეს სამხრეთ კავკასიაში უსაფრთხოების კუთხით არსებულ ვითარებაზე, ასევე ინციდენტთა პრევენციისა და მათზე რეაგირების მექანიზმების მუშაობაზე.

რუსეთის საგარეო უწყების ცნობით, გრიგორი კარასინმა ევროკავშირის წარმომადგენელთან დევნილთა დაბრუნების თემაზე გაერო-ში მიღებული რეზოლუციისა და „ოთხოზორია-ტატუნაშვილის სიის“ საკითხები დააყენა. მოსკოვის აზრით, მსგავსი ინიციატივები ამწვავებს თბილისის ურთიერთობებს სოხუმთან და ცხინვალთან.

„იმის მიუხედავად, რომ თბილისში საუბრობენ მათ კეთილ განზრახვებსა და ნაბიჯებზე უკეთესი მომავლისკენ, რეალურად, საქართველოს პოლიტიკური გადაწყვეტილებები ხელს უწყობს სოხუმთან და ცხინვალთან ურთიერთობების გამწვავებას“, – წერია რუსეთის საგარეო საქმეთა სამინისტროს განცხადებაში.

უწყების ცნობით, შეხვედრაზე მხარეებმა ჟენევის ფორმატში პროგრესის მიღწევის მნიშვნელობაზეც ისაუბრეს.