მსოფლიო

საქართველოს ხელისუფლებას ჩემი ექსტრადიცია რომ სურდეს, გუშინვე გააკეთებდა - მიხეილ სააკაშვილი

უკრაინიდან დეპორტირებული საქართველოს ყოფილი პრეზიდენტი მიხეილ სააკაშვილი პოლონეთს პოლიტიკურ თავშესაფარს არ სთხოვს. ამის შესახებ მან არხ NEWSONE-ს უთხრა.

„ახლა პოლონური პოლიციის დაცვის ქვეშ ვარ. ველაპარაკე შინაგან საქმეთა სამინისტროს ხელმძღვანელობას, მათ დამირეკეს, როცა აეროპორტში ჩამოვედი. პოლონეთს პოლიტიკურ თავშესაფარს არ ვთხოვ“, -თქვა ოდესის ექს-გუბერნატორმა.

სააკაშვილის თქმით, თვითმფრინავში სამართალდამცველებმა მას საიმიგრაციო სამსახურის დადგენილება წაუკითხეს.

საქართველოს ყოფილმა პირველმა პირმა სასაცილო უწოდა მისი პოლონეთიდან საქართველოში ექსტრადიციის შესაძლებლობას.

„როგორც ოდესაში იტყვიან, ჩემს ჩუსტებს ნუ აცინებთ. საქართველოში ამ ხელისუფლებას ეშინია ჩემი, როგორც ეშმაკს საკმევლის. მათ რომ ჩემი ექსტრადიცია სურდეთ, გუშინვე გააკეთებდნენ. თავიდანვე ვამბობდი, რომ საქართველოსა და უკრაინას ჩემ წინააღმდეგ სერიოზული ბრალდებები არ აქვთ“, -განაცხადა სააკაშვილმა.

ოდესის ექს-გუბერნატორი სპეციალურ პრესკონფერენციას გამართავს ვარშავაში.

გუშინ სპეცრაზმელთა ჯგუფმა სააკაშვილი კიევში, რესტორან „სულგუნში“ დააკავა. შემდეგ ოდესის ექს-გუბერნატორი კერძო თვითმფრინავით პოლონეთში გადაიყვანეს „რეადმისიასთან“ [არალეგალის იმ ქვეყანაში დაბრუნება, საიდანაც ის არალეგალურად შევიდა სხვა სახელმწიფოში] დაკავშირებული განცხადების მიხედვით, რომელიც პოლონურ მხარეს უკრაინის ეროვნულმა საიმიგრაციო სამსახურმა მიაწოდა.

ანა მებურიშვილი