მსოფლიო

საქართველოს 10 მოქალაქეს უკრაინაში შესვლა აუკრძალა

უკრაინის სახელმწიფო სასაზღვრო სამსახურმა საქართველოს 10 მოქალაქეს უკრაინაში შესვლა აუკრძალა, ხოლო კიდევ 6 პირის მიმართ იგეგმება ბინადრობის უფლების გაუქმება. ამის შესახებ სამართალდამცავი საქმიანობის უზრუნველყოფის საკანონმდებლო საკითხებში საპარლამენტო კომიტეტის სხდომაზე სასაზღვრო სამსახურის უფროსის მოადგილემ ვასილი სერვატიუკმა განაცხადა.

მისი განმარტებით, ამ პირებმა 10 სექტემბერს მიხეილ სააკაშვილთან ერთად უკრაინის საზღვარი უკანონოდ გადაკვეთეს.

„ის პირები, რომლებიც იდენტიფიცირებული იყვნენ და დამნაშავედ ცნეს სახელმწიფო საზღვრის გადაკვეთისას წესრიგის დარღვევაში , სახელმწიფო სასაზღვრო სამსახურის განყოფილებაში გამოცხადნენ. მათზე შედგენილია ოქმები და ისინი დაბრუნდნენ თავიანთი სახელმწიფოს ტერიტორიაზე, უკრაინის სახელმწიფო სასაზღვრო სამსახურის უფლებამოსილების თანახმად, სახელმწიფო საზღვრის გადაკვეთისას კანონდარღვევის გამო ამ პირების მიმართ იყო მიღებული გადაწყვეტილება, რომ გარკვეული პერიოდით მათ აეკრძალებათ უკრაინის ტერიტორიაზე შესვლა“, - განაცხადა სერვატიუკმა.

შეგახსენებთ, საქართველოს ექს-პრეზიდენტმა და ოდესის ყოფილმა გუბერნატორმა, მიხეილ სააკაშვილმა მხარდამჭერებთან ერთად უკრაინის საზღვარი 10 სექტემბერს გადაკვეთა.

სასაზღვრო სამსახურმა 350 ადამიანის იდენტიფიცირება მოახერხა, ვინც სასაზღვრო-გამშვებ პუნქტ „შეგინში“ მომხდარ მოვლენებში მიიღო მონაწილეობა.

ანა მებურიშვილი