კომენტარი

საქართველომ მიხეილ სააკაშვილის ექსტრადიციის მოთხოვნა მინისტრ მღებრიშვილის სამარცხვინო ჩანაწერის „გაპრავების“ მიზნით გააგზავნა - ბექა ბასილაია

ექსტრადირების მოთხოვნა არის თავიდან ბოლომდე პოლიტიკურად მოტივირებული, - განაცხადა საქართველოს ყოფილი პრეზიდენტის, მიხეილ სააკაშვილის ადვოკატმა ბექა ბასილაიამ ტელეკომპანია ,,პირველის“ გადაცემაში ,,რეაქცია.“

ყოფილი პრეზიდენტის ინტერესების დამცველი ვარაუდობს, რომ ,,საქართველომ ყოფილი პრეზიდენტის ექსტრადიციის მოთხოვნა მინისტრ მღებრიშვილის სამარცხვინო ჩანაწერის „გაპრავების“ მიზნით გააგზავნა.“

,,რეალურად, მაღალი ალბათობით, მას შემდეგ, რაც მღებრიშვილის ჩანაწერი გავრცელდა, თავიანთი თავის დაზღვევის მიზნით და იმ სამარცხვინო ჩანაწერის გაპრავების მიზნით გაგზავნა მოთხონვა ქართულმა მხარემ“, - განაცხადა ბასილაიმ.

საუბარია, ჩანაწერზე, რომლის ერთ-ერთ მონაწილედ გიორგი მღებრიშვილი სახელდება. ჩანაწერში უკრაინის შს მინისტრის სახელით რუსი პრანკერი თითქოსდა საქართველოს შს მინისტრს ესაუბრება მიხეილ სააკაშვილის საქართველოსთვის გადმოცემასთან დაკავშირებით.

ავტორების მიერ გავრცელებული ჩანაწერის თანახმად, გიორგი მღებრიშვილი ამბობს, რომ სააკაშვილი საქართველოში არ სჭირდებათ და ქვეყნის ხელისუფელბას არ სურს ექსპრზეიდენტის ექსტრადირება.