კომენტარი

საქართველომ არ უნდა დაუშვას, რომ „გაზპრომთან“ ერთი-ერთზე დარჩეს - გიორგი მარგველაშვილი

საქართველოს პრეზიდენტი გიორგი მარგველაშვილი ტელეკომპანია „იბერიასთვის“ მიცემულ ინტერვიუში „გაზპრომთან“ თანამშრომლობაზე ისაუბრა.

გიორგი მარგველაშვილის თქმით, საქართველო უნდა იყოს მომზადებული „გაზპრომთან“ საუერთიერთობოდ, რადგან კომპანია რუსეთის ინტერესებს ატარებს.

„ „გაზპრომი“ არის რუსული საგარეო პოლიტიკის ერთ-ერთი ძლიერი ხელი. და როდესაც გაზპრომთან ურთიერთობ, ამ შემთხვევაში, ჩვენ ყველა უნდა ვიყოთ ძალიან კონცენტრირებული, კოორდინირებული ერთმანეთში და არა მარტო ერთმანეთთან, არამედ ჩვენს პარტნიორებთანაც“, - განაცხადა მარგველაშვილმა.

მარგველაშვილის თქმით, საქართველომ არ უნდა დაუშვას , რომ „გაზპრომთან “ „ერთი-ერთზე დარჩეს“.
ქვეყნის პირველმა პირმა განაცხადა, რომ ის პარლამენტში გამოვიდა ინიციატივით, რომ დეპუტატები და პრეზიდენტი ერთიან პოზიციაზე ყოფილიყვნენ ამ თემაზე.

„ნათლად გამოჩნდა, რომ საქართველოს შესაძლებლობები შესუსტდა ამ მოლაპარაკებების შედეგად. მე იმ კონტრაქტზე კი არ ვსაუბრობ, მე ვსაუბრობ იმ სიტუაციაზე, რომლის შედეგია ეს კონტრაქტი. ნათლად გამოჩნდა, რომ ჩვენი რაღაც პოზიციები შესუსტდა ამ მიმართულებით. ახლა რა ვქნათ, ახლა მაინც კოორდინირებულად ჩავერთოთ დაპირისპირების რეჟიმში, მაგრამ დეპუტატებმა პარლამენტში იცოდნენ ამის შესახებ, რომ იყოს პრეზიდენტი ჩართული და ერთიანი მესიჯით და პოზიციით ვიყოთ ამ თემაზე. იმიტომ რომ ამ თემაზე ჩვენ ერთმანეთის მოწინააღმდეგეები არა ვართ. იდეაში, ჩვენ ამ თემით საქართველოს ვიცავთ“, - თქვა პრეზიდენტმა „იბერიასთან“ ინტერვიუში.

მრგველაშვილმა განაცხადა, რომ „გაზპრომთან“ მიმართებით უნდა გაძლიერდეს მუშაობა საქართველოს ინტერესების დაცვის კუთხით.

ანა მებურიშვილი