კომენტარი

საქართველო არც ერთ პროვოკაციას არ აჰყვება და ისეთ ქვეყანად დარჩება, სადაც მშვიდობა და განვითარება გარანტირებულია - არჩილ თალაკვაძე

საპარლამენტო უმრავლესობის ლიდერმა არჩილ თალაკვაძემ რუსეთის პრეზიდენტის, ვლადიმერ პუტინის აფხაზეთში ვიზიტთან დაკავშირებით აღნიშნა, რომ აფხაზეთის მოსახლეობაში სულ უფრო მეტი კითხვა ჩნდება, როდის ექნება აფხაზეთის მოსახლეობას მშვიდობა და კეთილდღეობა, ამასთან, როდის მიეცემა აფხაზეთს ეკონომიკური განვითარების შესაძლებლობები.

„ჩვენი აფხაზი მეგობრებისგან ვიცი, რომ აფხაზეთის მოსახლეობაში სულ უფრო მეტი კითხვა ჩნდება იმასთან დაკავშირებით, თუ როგორია აფხაზეთის მომავალი, როდის მიეცემა აფხაზეთს ეკონომიკური განვითარების შესაძლებლობები, როდის განხორციელდება ისეთი სოციალური პროგრამები, როგორიც აქვს საქართველოს და როდის ექნება აფხაზეთის მოსახლეობას მშვიდობა და კეთილდღეობა. ამ კითხვებზე პრეზიდენტ პუტინის ადმინისტრაციას პასუხები არ აქვს, ერთადერთი პასუხი ოკუპაცია და იარაღის ჟღარუნია“, - განაცხადა არჩილ თალაკვაძემ.

მისივე თქმით, საქართველო არც ერთ პროვოკაციას არ აჰყვება და ისეთ ქვეყანად დარჩება, სადაც მშვიდობა და განვითარება გარანტირებულია.

„რუსეთის ფედერაციის წარმომადგენელთა გახშირებული ვიზიტები ამ კითხვებზე პასუხების უქონლობას უკავშირდება. ჩვენი ხელისუფლება პრაგმატულ, საგარეო პოლიტიკას ახორციელებს და ამასთან დაკავშირებით მაიკ პენსის შეფასებები ნახეთ, რომ ჩვენი პასუხი ნებისმიერ საოკუპაციო და მილიტარისტულ რიტორიკაზე - დემოკრატიული, ეკონომიკური განვითარება, რეფორმები და რეგიონში ერთ-ერთი სწრაფად განვითარებადი რეფორმატორი სახელმწიფოს პოზიციის კიდევ უფრო განმტკიცებაა.

საქართველოს ინტერესების ხარჯზე ვერანაირი დათმობები ვერ მოხდება, თუმცა არც ერთ პროვოკაციას არ ავყვებით და ქვეყნის მშვიდობიან განვითარებას ვუზრუნველყოფთ და საქართველო ისეთ ქვეყანად დარჩება, სადაც მშვიდობა და განვითარება გარანტირებულია“, - განაცხადა თალაკვაძემ.

ნინო ექვთიმიშვილი