კომენტარი

სამოქალაქო საზოგადოების წევრები მიმართავენ ბურჭულაძეს, რომელიც კრემლიდან ნებისმიერ დასტვენაზე მიქრის - სოზარ სუბარი

საქართველოს ლტოლვილთა და განსახლების მინისტრის სოზარ სუბარის შეფასებით, ყველა ის ადამიანი, ვინც მონაწილეობს სამოქალაქო საზოგადოების მიერ წამოწყებულ კამპანიაში, ნაციონალური მოძრაობის მხარდამჭერია“.

ამის შესახებ სუბარმა მთავრობის სხდომის დასრულების შემდეგ ჟურნალისტებს განუცხადა.

„ყველა ის ადამიანი, ვინც ამ კამპანიაში მონაწილეობს, ძალიან მარტივად არის ნაციონალური მოძრაობის მხარდამჭერი. მათ კამპანიას რეალურად ჰქვია მხარი დავუჭიროთ ნაციონალურ მოძრაობას, მხარი დავუჭიროთ მიხეილ სააკაშვილს, მხარი დავუჭიროთ ადამიანების წამებას, კერძო საკუთრების შელახვას და იმ ყველა საშინელებას, რაც ხდებოდა 9 წლის განმავლობაში. თვითონ სათაურიც და მიმართვის ადრესატებიც ძალიან სასაცილოა, იმიტომ რომ, ლაპარაკობენ პროდასავლურ ძალებზე და ჩამონათვალში არის ლეიბორისტული პარტია, რომელიც არც დასავლეთია, არც აღმოსავლეთი, არც სამხრეთი და არც ჩრდილოეთი. ეს არის ხმა წარსულიდან და მეტი არაფერი; ან მიმართავენ ბურჭულაძეს, რომელიც კრემლიდან ნებისმიერ დასტვენაზე მიქრის, იქ კონცერტებს აწყობს და უმღერის დითირამბებს; ან ნაციონალური მოძრაობა, რომლის დასავლეთში, მე არ ვიცი, რა იგულისხმება. დასავლეთში იყო ჰიტლერი, რომელიც ატარებდა იმ პოლიტიკას, რასაც ისინი ატარებდნენ, სხვა დასავლეთთან ნაციონალურ მოძრაობას კავშირი არა აქვს“, - განაცხადა სოზარ სუბარმა.

მისი თქმით, თუ საუბარია დასავლეთზე და იმ ღირებულებებზე რომლისკენაც მიდის ქვეყანა - „ეს არის ადამიანის უფლებების პატივისცემა, რაშიც უზარმაზარი ნაბიჯები გადაიდგა 4 წლის განმავლობაში; ეს არის საქართველოს ევროპული და ევროატლანტიკური ინტეგრაცია, რაშიც უზარმაზარი ნაბიჯები გადაიდგა; სწორედ ეს არის ის გეზი რომელსაც „ქართული ოცნება“ ატარებს“.

მონიკა დავლიანიძე