მსოფლიო

სამ დეკემბრამდე უნდა დამაპატიმრონ – მიხეილ სააკაშვილი

საქართველოს ექს–პრეზიდენტის, ოდესის ოლქის ყოფილი გუბერნატორის მიხეილ სააკაშვილის ინფორმაციით,უკრაინის პრეზიდენტმა პეტრო პოროშენკომ მისი დაპატიმრების ბრძანება გასცა.

ამის შესახებ სააკაშვილმა საგანგებო ბრიფინგზე განაცხადა.

მისი თქმით, დაკავება ძალაუფლების ბოროტად გამოყენების ბრალდებით მოხდება.

“დღეს ჩემთვის ცნობილი გახდა, რომ პოროშენკომ საბოლოოდ გადაკვეთა წითელი ხაზი და გასცა ჩემი დაპატიმრების განკარგულება უკრაინაში სახელმწიფო გადატრიალების მცდელობისთვის და კიდევ რაღაც გამოგონილი ოდესის საქმისთვის. ეს განკარგულება მან მისცა გენერალურ პროკურორს იური ლუცენკოს.

მათ შემდგომი ორი- სამი დღის განმავლობაში, 3 დეკემბრისთვის დაგეგმილ მარშამდე უნდა განახორციელონ ჩემი დაკავების, იზოლაციისა და განეიტრალების გეგმა. იმ მიზნით, რომ ჩაახშონ მშვიდობიანი პროტესტი და უკრაინელი მოქალაქეების ნების გამოხატვა.

მათ წამოწიეს არარსებული საქმეები, რომელიც უკავშირდება ჩემი ოდესის გუბერნატორად მუშაობის პერიოდს. მათ სურთ, რომ ეს ყველაფერი მოარგონ კონკრეტულ ბრალს, მაგალითად ძალაუფლების ბოროტად გამოყენებას.

მათ მისცეს დავალება დეპარტამენტს, რომელსაც კოვალენკო ხელმძღვანელობს. მოითხოვეს, ჩემი ხმის ნიმუშები იმ მიზნით, რომ მოახდინონ აუდიო ჩანაწერების ფალსიფიკაცია და ამ ჩანაწერებს ჩემი დაკავების დღეს გამოაქვეყნებენ. ისინი ცდილობენ დაშინების გზით იმოქმედონ. სამ რიცხვამდე ჩამსვან წინასწარი დაკავების იზოლატორში და ამგვარად ჩაკლან მშვიდობიანი პროტესტი უკრაინაში“,–განაცხადა მიხეილ სააკაშვილმა.

მონიკა დავლიანიძე