კომენტარი

საკონსტიტუციო კომისიაში მაქსიმალურად ბევრი აქტორი უნდა მონაწილეობდეს, მათ შორის პრეზიდენტიც - სერგი კაპანაძე

ნაციონალური მოძრაობის წევრი, პარამენტარი სერგი კაპანაძე მიიჩნევს, რომ საკონსტიტუციო კომისია უნდა იყოს მაქსიმალურად ინკლუზიური და მასში მაქსიმალურად ბევრი აქტორი უნდა მონაწილეობდეს.

როგორც კაპანაძემ თემის კომენტირებისას მედიას განუცხადა, კომისიაში პრეზიდენტის მონაწილეობა მნიშვნელოვანია.

„ასეთი ტიპის საკონსტიტუციო კომისიები უნდა იყოს მაქსიმალურად ინკლუზიური, მაქსიმალურად ბევრი აქტორი უნდა მონაწილეობდეს მასში და მათ შორის პრეზიდენტიც. ამიტომ, ჩემი აზრით, ასეთი ტიპის ჩართულობა უნდა იყოს უზრუნველყოფილი, თუ ამ კომისიამ უნდა განიხილოს ყველაზე მნიშვნელოვანი საკითხები, რომლებიც ეხება კონსტიტუციის ცვლილებას. ის, რომ დღეს არის საჭირო ასეთი ტიპის დიალოგი, ეს არის ცალსახა და ამიტომ, მეც მინდა მოვუწოდო ყველა აქტორს, რომ მაქსიმალურად გაითვალისწინოს ეს მოთხოვნა, რომელიც საზოგადოებაში არსებობს“,-განაცხადა კაპანაძემ.

საკონსტიტუციო კომისია 60 წევრით დაკომპლექტება, მათ შორის მასში პრეზიდენტის ადმინისტრაციის ორი წევრის მონაწილეობაც არის გათვალისწინებული.

თუმცა, პრეზიდენტის ადმინისტრაციის ხელმძღვანელმა გიორგი აბაშიშვილმა განაცხადა, რომ უარს ამბობენ კომისიის მუშაობაში მონაწილეობაზე და მასში საკუთარ წარმომადგენლებს არ მიავლენენ.

მონიკა დავლიანიძე