კომენტარი

საკონსტიტუციო კომისია არასდროს ყოფილა პრეზიდენტის ხელმძღვანელობით - თამარ ჩუგოშვილი

საპარლამენტო უმრავლესობის წევრის, თამარ ჩუგოშვილისთვის გაუგებარია პრეზიდენტის ადმინისტრაციისა და ოპოზიციის კრიტიკა იმასთან, დაკავშირებით, რომ „ქართულმა ოცნებამ“ უარყო პრეზიდენტის ინიციატივა, რომლითაც თანათავმჯდომარეები უნდა ყოფილიყვნენ პრეზიდენტი, პრემიერი და პარლამენტის თავმჯდომარე.

„არსებობდა საკონსტიტუციო კომისია და არასდროს ყოფილა ის პრეზიდენტის ხელმძღვანელობით. საკანონმდებლო პროცესს მართავს საქართველოს პარლამენტი. ძალიან ნორმალური და ბუნებრივია, რომ სწორედ საქართველოს პარლამენტს ჰქონდეს წამყვანი როლი საკონსტიტუციო ცვლილებების შემუშავებაზე. არასდროს საქართველოში ეს საკითხი არ დამდგარა დღის წესრიგში. სრულიად გაუგებარია ახლა რატომ დადგა და რატომ მიიჩნევს ვიღაც, თითქოს ამით რამე კნინდება,“ - აცხადებს თამარ ჩუგოშვილი.

საკონსტიტუციო კომისიის შექმნის შესახებ პარლამენტის თავმჯდომარის დადგენილებას დღეს პარლამენტის ბიურო დაამტკიცებს. როგორც ცნობილია, კომისიას თავად ირაკლი კობახიძე უხელმძღვანელებს.

ნინო ექვთიმიშვილი