კომენტარი

საკანონმდებლო ცვლილებები არ განხორციელებულა და 100%-იანი თანხმობის გარეშე მუნიციპალიტეტს არ აქვს უფლება, ხალხი გამოიყვანოს, ეს თუ არასწორია, დღესვე დავტოვებ თანამდებობას - კახა კალაძე

ჩემი თხოვნაა, ნუ გაავრცელებთ არასწორ, მცდარ ინფორმაციას. სრული პასუხისმგებლობით ვაცხადებ, რომ 100%-იანი თანხმობის გარეშე მუნიციპალიტეტს არ აქვს უფლება, ხალხი შენობიდან გამოიყვანოს, – ამის შესახებ დედაქალაქის მერმა, კახა კალაძემ განაცხადა.

მისი თქმით, მსგავსი ტიპის საკანონმდებლო ცვლილებები არ განხორციელებულა.

„მინდა, კიდევ ერთხელ მივუსამძიმრო ტრაგედიის შედეგად გარდაცვლილთა ოჯახებს. იყო უბედური შემთხვევა, რაც ძალიან ცუდია და მძიმეა, დაიღუპა ორი ადამიანი. რაც შეეხება ავარიულობის კატეგორიას, ამას არსებითი მნიშვნელობა არ აქვს, თუმცა აღნიშნულ შენობას აქვს მესამე კატეგორია. ჩემი შეცდომა იყო, როდესაც ვთქვი, რომ მეხუთე კატეგორია იყო, თუმცა ამას არსებითი მნიშვენლობა არ აქვს, რადგან შენობაში ხალხი ცხოვრობდა, მიუხედავად იმისა, რომ არაერთი შეხვედრა გაიმართა გამგეობის მხრიდან და საუბარი იყო კორპუსის ჩანაცვლებაზე. 2021 წელს საზოგადოებას დავპირდით, რომ დავდებდით კონკრეტულ პროგრამას, რომლითაც შევძლებდით ავარიული შენობა-ნაგებობების ჩანაცვლებას. ეს პროგრამა არსებობს, მუშაობს, თუმცა არსებობს გამოწვევები. არის შემთხვევები, როდესაც მოსახლეობის 100-პროცენტიანი თანხმობის მიღება ვერ ხერხდება სხვადასხვა მიზეზის გამო. მაგალითად, ადამიანს, რომელიც 50 კვ.მ.-ში ცხოვრობს, სურვილი აქვს, უფრო დიდი ფართი მიიღოს, რისი გაკეთების შესაძლებლობა მუნიციპალიტეტს არ აქვს. ამ ოჯახებს, ამ ადამიანებს ვთავაზობთ ქირით უზრუნველყოფას, არანაირი გადასახადი არ ექნებათ, დროებით მოგვიწევს მათი გაყვანა და დავაბრუნებთ ახალაშენებულ კორპუსებში, რომლებიც იქნება გარემონტებული და მოწესრიგებული. ამ საკითხზე უამრავი განცხადება მაქვს გაკეთებული, მოწოდებები მოსახლეობის მიმართ, რომ იაქტიურონ და გამოიყენონ აღნიშნული პროგრამა“, – განაცხადა კახა კალაძემ.

კითხვაზე, რომ, 2023 წელს მიღებული დადგენილებით, მერიას შეეძლო მოსახლეობის სრული უმრავლესობის თანხმობით ჩანაცვლების პროგრამაში ჩართვა, კახა კალაძემ უპასუხა, რომ ეს არის სიცრუე.

„ჩემი თხოვნაა, ნუ გაავრცელებთ არასწორ, მცდარ და ტყუილ ინფორმაციას. კახა კალაძე, ქალაქის მერი სრული პასუხისმგებლობით გეუბნებით, რომ ამ ტიპის საკანონმდებლო ცვლილებები არ განხორციელებულა. ეს თუ არასწორია, დღესვე დავტოვებ თანამდებობას. არანაირი საკანონმდებლო ცვლილებები არ განხორციელებულა და 100-პროცენტიანი თანხმობის გარეშე მუნიციპალიტეტს არ აქვს არანაირი უფლება, ხალხი გამოიყვანოს. მსგავსი რაღაცები ხდებოდა 2012 წლამდე და გაიხსენეთ თაბუკაშვილის ქუჩის მაგალითი, როდესაც სპეცრაზმით გამოყარეთ ხალხი“, – განაცხადა კახა კალაძემ.