კომენტარი

საფრთხე არის მრავალი და ეს განპირობებულია იმით, რომ მამა გიორგის ჩვენებაში არიან გარკვეული პირები დასახელებულნი - ადვოკატი

როცა უზრუნველყოფილი იქნება მამა გიორგის მოთხოვნა და გვეცოდინება, რა გადაწყვეტილებას მიიღებს სახელმწიფო ბრალდება, იქნება შესაბამისი მოქმედება, - განაცხადა ე.წ. ციანიდის საქმეზე ბრალდებულ, დეკანოზ გიორგი მამალაძის ადვოკატმა, მიხეილ რამიშვილმა იმ კითხვის პასუხოდ, თუ როდის გააგრძელებს ბრალდებული ჩვენების მიცემას.

მისი თქმით, დეკანოზის დაკითხვა არ ხერხდება ერთადერთი მიზეზით, რადგან ის მოითხოვს მისი და მისი ოჯახის წევრების უსაფრთხოების უზრუნველყოფისთვის დაცვის დანიშვნას.

,,საფრთხე არის მრავალი, ფიზიკური, ფსიქოლოგიური და ეს განპირობებულია იქიდან გამომდინარე, რომ მამა გიორგის ჩვენებაში არიან გარკვეული პირები დასახელებულნი და ვარაუდი თუ არსებობს, რომ მან სავარაუდოდ აღნიშნული დანაშაული ჩაიდინა, ასევე უფლება აქვს იმ ვარაუდის არსებობასაც, რომ ვინმე ადამიანის მხრიდან ან ჯგუფის მხრიდან მისი ოჯახის წევრებზე გარკვეული სახის ზეწოლას ჰქონდეს ადგილი’’, - აღნიშნა ადვოკატმა.

კითხვაზე, შესაძლო საფრთხე მოდის სასულიერო თუ საერო პირებისგან, მიხეილ რამიშვილი პასუხობს, რომ ,,არსებობენ როგორც სასულიერო პირები, ისე სრულიად შესაძლებელია, თან სდევდენ საერო პირებიც.’’

ამასთან, ადვოკატი არც უარყოფს და არც ადასტურებს გავრცელებულ ინფორმაციას იმის შესახებ, რომ დეკანოზის უკვე მიცემულ ჩვენებაში ნახსენები იყო, თითქოსდა შორენა თეთრუაშვილმა 500 დოლარის სანაცვლოდ სთხოვა მამა გიორგი მამალაძეს ციანიდის შეძენა გერმანიაში მყოფი მისი ახლობლისათვის, ხატმწერისთვის.

,,მე არ ვიცი საიდან გავრცელდა ან ვინ ავრცელებს ამ ინფორმაციას, მაგრამ ყველაფერი შესაძლებელია, რომ იყოს ჩვენებაში’’, - აღნიშნა მიხეილ რამიშვილმა.

ნინო ექვთიმიშვილი