მსოფლიო

საფრანგეთის სამხრეთში „ყვითელი ჟილეტების“ მიერ გზის გადაკეტვის გამო ერთი ადამიანი დაიღუპა

საფრანგეთის სამხრეთში, ქალაქ პერპინიანში 22 დეკემბრის ღამეს 36 წლის მამაკაცი დაიღუპა. მისი მანქანა ე.წ. „ყვითელი ჟილეტების“ მიერ დატოვებულ სატვირთო ავტომობილს დაეჯახა, რომლითაც მოძრაობის წევრებმა გზა გადაკეტეს.

ფრანგული მედიის ინფორმაციით, „ყვითელი ჟილეტების“ პროტესტის პერიოდში ეს დაღუპვის უკვე მე-10 შემთხვევაა.

ცნობისთვის, საფრანგეთში უკვე მეექვსე კვირაა გრძელდება მოძრაობა „ყვითელი ჟილეტების“ საპროტესტო გამოსვლები. თავდაპირველად ათასობით ადამიანი ქუჩაში გამოვიდა იმის გამო, რომ ქვეყნის მთავრობა საწვავზე გადასახადის გაზრდას აპირებდა. პროტესტის გამო, რომელიც რამდენჯერმე არეულობაში გადაიზარდა, ხელისუფლება უკან დაიხია, თუმცა, ამის მიუხედავად, დემონსტრაციები არ შეწყვეტილა.