მსოფლიო

საერთაშორისო ოლიმპიურმა კომიტეტმა 2018 წლის ზამთრის ოლიმპიურ თამაშებზე კიდევ 13 რუსი სპორტსმენი და 2 მწვრთნელი არ დაუშვა

საერთაშორისო ოლიმპიურმა კომიტეტმა არ დაუშვა სამხრეთ კორეაში გასამართ ზამთრის ოლიმპიურ თამაშებზე 13 რუსი სპორტსმენი და 2 მწვრთნელი, რომლებიც დოპინგის საქმეზე სპორტულმა არბიტრაჟმა გაამართლა.

სასამართლოს გადაწყვეტილების მიუხედავად კომიტეტმა ეჭვი გამოთქვა სპორტსმენების „სისუფთავეში“. როგორც ხელმეორედ ჩატარებულმა გამოკვლევებმა ცხადყო, სპორტსმენებს დოპინგის კვალი აღმოაჩნდა.

„დამატებითი ინფორმაცია მოიცავს მონაცემებს ფარმაცევტული ბაზიდან, აკრძალული ნივთიერებების კვალს, სტეროიდებით მანიპულირების მტკიცებულებებსა და სხვა კონფიდენციალურ ინფორმაციას, რომელიც მიწოდებულია საერთაშორისო ანტისადოპინგო სააგენტოს მიერ“, -ნათქვამია განცხადებაში.

1 თებერვალს სპორტულმა საარბიტრაჟო სასამართლომ დააკმაყოფილა 28 რუსი სპორტსმენის საჩივარი, რომელიც ეხებოდა ოლიმპიური კომიტეტის გადაწყვეტილებას მათი ოლიმპიადიდან მოხსნის შესახებ. ასევე რუსმა სპორტსმენებმა 2014 წლის სოჭის ოლიმპიადაზე მოპოვებული მედლების ნაწილი დაიბრუნეს, რაც ჩამორთმეული ჰქონდა სადოპინგო სკანდალის გამო.

სასამართლოს განმარტებით, 28 სპორტსმენის მიმართ საკმარისი მტკიცებულებები წარდგენილი არ ყოფილა.

მანამდე საერთაშორისო ოლიმპიურმა კომიტეტმა ამ სადოპინგო სკანდალის გამო გადაწყვიტა, არ დაუშვას რუსეთის ოლიმპიური ნაკრები 2018 წლის ზამთრის ოლიმპიადაზე. გავრცელებული ინფრომაციით, სამხრეთ კორეაში ჩასვლას მხოლოდ ის სპორტსმენები შეძლებენ, რომლებიც დოპინგის მიღებაში შემჩნეულები არ იყვნენ ოღონდ იმ პირობით, თუკი ისინი ნეიტრალური დროშის ქვეშ გამოვლენ.

2018 წლის ზამთრის ოლიმპიური თამაშები სამხრეთ კორეის ქალაქ ფხენჩხანში 9-დან 25 თებერვლამდე გაიმართება.