კომენტარი

საჯაროვდება ფაქტები, რომლებიც ადასტურებს კავშირებს ყოფილი ხელისუფლებისა და სასამართლო ხელისუფლების წარმომადგენლებს შორის - არჩილ თალაკვაძე

საპარლამენტო უმრავლესობის ლიდერი, არჩილ თალაკვაძე ინტერესდება, თუ რამდენად იყო პოლიტიკური მოტივაციებისგან თავისუფალი საკონსტიტუციო სასამართლო ფარულ მოსმენა-მიყურადების კანონზე გადაწყვეტილების მიღების დროს.

როგორც თალაკვაძემ ჟურნალისტებს განუცხადა, ბოლო პერიოდში გასაჯაროვდა ისეთი ფაქტები, რომლებიც ადასტურებენ ყოფილი ხელისუფლების კავშირებს სასამართლო ხელისუფლების წარმომადგენლებთან.

,,მიჩნდება უკვე შეკითხვები, რამდენად იყო ეს გადაწყვეტილება თავისუფალი პოლიტიკური მოტივაციებისგან, იმიტომ, რომ დღეს ჩვენ ვხედავთ უკვე მოვლენათა ახალ ჯაჭვს, საჯაროვდება საზოგადოებისთვის ისეთი ფაქტები, რომლებიც ადასტურებს კავშირებს ყოფილი ხელისუფლების წარმომადგენლებსა და სასამართლო ხელისუფლების წარმომადგენლებს შორის. ჯერჯერობით შეკითხვებზე პასუხები ვერ მოვისმინეთ. თუ რა ფარულ მოლაპარაკებებს აწარმოებდა ბატონი გვარამია სასამართლოს ხელმძღვანელ ახვლედიანთან. იცით, რომ გამოძიება არის დაწყებული და ჯერჯერობით პასუხი არ გაუციათ იმ შეკითხვებზე, ბატონ ქათამაძესა და ბატონ ალავიძეს, რა კავშირი ჰქონდათ და ვინ უგზავნიდა ყოფილი ხელისუფლებიდან მათ წერილებს, სადაც შეთავაზებებზე, მუქარასა თუ მადლიერებაზე იყო საუბარი.

როდესაც არის ეს ვითარება, ჩვენ ვერ გამოვრიცხავთ, იყო თუ არა საუკეთესო ქვეყნისთვის ის გადაწყვეტილება, რომელიც მიიღო საკონსტიტუციო სასამართლომ. მე ვსვამ ერთადერთ შეკითხვას, თუ რატომ მოხდა იმ პერიოდში რამდენიმე მნიშვნელოვანი გადაწყვეტილების მიღება საკონსტიტუციო სასამართლოს მხრიდან ზედიზედ, მაშინ როდესაც საკონსტიტუციო სასამართლო წლები იხილავდა ბევრად უფრო ნაკლები რაოდენობის საქმეებს”, - განაცხადა თალაკვაძემ.

ნინო ექვთიმიშვილი