მსოფლიო

საბერძნეთ თურქეთის საზღვართან გერმანელი ჟურნალისტები დააკავეს

საბერძნეთის პოლიციამ ევროსში, თურქეთთან საზღვრის აკრძალულ ზონაში ორი გერმანელი ჟურნალისტი დააკავა. ერთი 33 წლის ქალი, ხოლო მეორე 31 წლის კაცია.

ევროსის ზონაში ყოფნისთვის სამხედროების ნებართვაა საჭირო.

ჟურნალისტები ამტკიცებენ, რომ ისინი გერმანული ტელეარხის, ARD-სთვის მუშაობენ და ევროსში იმ თურქების შესახებ აკეთებდნენ რეპორტაჟს, რომლებიც გერმანიიდან სამშობლოში მდინარე ევროსით ბრუნდებიან.

დაკავებულები ირწმუნებიან, რომ ნებართვა აკრძალულ ზონაში ყოფნისთვის მოთხოვნილი ჰქონდათ, თუმცა მუშაობა მის მიღებამდე დაიწყეს.

გასულ კვირას ამ ზონაში თურქებმა ორი ბერძენი სამხედრო დააკავეს. სამხედროებმა განაცხადეს, რომ ცუდ ამინდში გზა დაკარგეს და თურქეთის ტერიტორიაზე შემთხვევით აღმოჩნდნენ. თურქული მხარე მათ გადაცემაზე უარს აცხადებს. საბერძნეთი კი ამბობს, რომ უბრალო ამბიდან ანკარამ სერიოზული ინციდენტი შექმნა.