კომენტარი

სააკაშვილი მშიშარა, მხდალია, ის ნაბიჯსაც არ გადაადგამს თუ ФСБ-თან არ არის შეთანხმებული - ემზარ კვიციანი

„პატრიოტთა ალიანსის“ წევრი ემზარ კვიციანი მიიჩნევს, რომ „მთელი მსოფლიოს სპეცსამსახურები არიან გაერთიანებული ერთი მიზნისთვის, რომ უკრაინა დააქუცმაცონ, ისევე როგორც საქართველოს აქუცმაცებენ“.

ამის შესახებ კვიციანმა პრესკონფერენციაზე უკრაინაში მიხეილ სააკაშვილის ირგვლის შექმნილი ვითარების კომენტირებისას განაცხადა.

მისი თქმით, მიხეილ სააკაშვილს ზესახელმწიფოები მართავენ და მისი ამოცანაა უკრაინის დაშლა.

ამასთან, პოლიტიკოსმა აღნიშნა, რომ სააკაშვილის მიერ უკრაინის საზღვრის „გარღვევის“ უკან რუსული ФСБ დგას.

„თქვენ იცით, რომ სააკაშვილი მშიშარა, მხდალი პიროვნებაა. ის ნაბიჯზაც არ გადაადგამს თუ ფსბ-თან არ არის შეთანხმებული. პირველ რიგში გუშინ სააკაშვილს ზურგს უმაგრებდა რუსეთის ფსბ, შემდეგ კი, ზესახელმწიფოები, რომლებიც შეთანხმებული არიან და უკრაინის დაშლა უნდათ“,-აღნიშნა კვიციანმა.

მან ასევე გაიხსენა სააკაშვილის შესვლა კოდორში. მისი თქმით, „მაშინაც უჭერდა მას მხარს გაეროც, მთელი მსოფლიოს სპეცსამსახურები. იგივე მოხდა გუშინ, სამარცხვინო ფაქტი უკრაინისთვის“.

ემზარ კვიციანის ვარაუდით, მიხეილ სააკაშვილს არ დააკავებენ.

„გამოვრიცხავ რომ მიხეილ სააკაშვილი შეიძლება დააკავონ. მას მხოლოდ მაშინ დააკავებენ, თუ 10-15 კაცი გამოვა და იტყვის სიმართლეს მასზე, მაშინ შეიძლება დააკავონ და გაწირონ რუსებმა, მანამდე არასოდეს მას თითს არ დააკარებენ“,-განმარტა ემზარ კვიციანმა.

მონიკა დავლიანიძე