კომენტარი

„რვიანის“ გარშემო ატეხილი ხმაური ნამდვილად უსიამოვნო ფაქტია, საკმაოდ ითქვა უკვე ამ საკითხზე, მეტი დრო აღარ დავკარგოთ, სჯობს, ისევ პროტესტზე და წინააღმდეგობაზე გადავერთოთ - პაატა მანჯგალაძე

„რვიანის“ გარშემო ატეხილი ხმაური უსიამოვნო ფაქტია, ამ საკითხზე ბევრი ითქვა, მეტი დრო აღარ დავკარგოთ, სჯობს, ისევ პროტესტზე გადავერთოთ, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

მისივე თქმით, „რვიანი“ მხოლოდ არჩევნებში არმონაწილე პარტიების კოორდინაციაა და სხვა საკითხებზე პარტიები დამოუკიდებლად იღებენ გადაწყვეტილებას.

„მინდა, ხაზგასმით ვთქვა, რომ „რვიანის“ გარშემო ატეხილ ხმაური ნამდვილად უსიამოვნო ფაქტია. დარწმუნებული ვარ, ეს არც თავად თამარ ჩერგოლეიშვილს მოეწონა და, როგორც ვიცი, მან ბოდიშიც მოიხადა. კიდევ ერთხელ განვმარტავ, დღეის მდგომარეობით, „რვიანი“ წარმოადგენს მხოლოდ არჩევნებში არმონაწილე პარტიების კოორდინაციას. დანარჩენ საკითხებზე თითოეული პარტია დამოუკიდებლად იღებს გადაწყვეტილებებს და თავად არის პასუხისმგებელი საკუთარ ქმედებებსა და რეპუტაციაზე.

ვფიქრობ, საკმაოდ ითქვა უკვე ამ საკითხზე, მეტი დრო აღარ დავკარგოთ, სჯობს, ისევ პროტესტზე და წინააღმდეგობაზე გადავერთოთ. 13 სექტემბერს უნდა შევუერთდეთ აქციას, დავიცვათ უვიზო, 4 ოქტომბერს ყველანი უნდა გავერთიანდეთ რუსთაველზე და დავიცვათ საქართველო“, – განაცხადა მანჯგალაძემ.

ცნობისთვის, „ნაციონალური მოძრაობის“ თავმჯდომარემ, თინა ბოკუჩავამ რვა ოპოზიციურ პარტიას მიმართა, სოციალურ ქსელში გამოყენებული ბავშვების ფოტოების გამო მიიღონ გადაწყვეტილება „ფედერალისტების“ ლიდერთან, თამარ ჩერგოლეიშვილთან ურთიერთობის გაწყვეტის შესახებ. საუბარია „ფეისბუქში“ გამოქვეყნებულ კომენტარებზე, სადაც ჩერგოლეიშვილი ბავშვების ფოტოებს იყენებს. აღნიშნულ პოსტთან დაკავშირებით თავად ჩერგოლეიშვილმა ბოდიში მოიხადა. ამასთან, თამარ ჩერგოლეიშვილი გამოეხმაურა თინა ბოკუჩავას განცხადებას და აღნიშნა: „გაუგებარია, რას ემსახურება ბოკუჩავას მუქარა, „ნაცმოძრაობა“ დე ფაქტო ისედაც გასული იყო „რვიანიდან“, ყველა წარმატებული ღონისძიების შემდეგ შარზე იყო და წიხლებს იქნევდა“.

წყარო