მსოფლიო

რუსული კვალი - კიევში მომხდარი აფეთქების უკან, შესაძლოა, რამზან კადიროვი იდგეს

უკრაინის შინაგან საქმეთა სამინისტრო არ გამორიცხავს, რომ კიევში მომხდარი აფეთქების უკან რუსული კვალი იდგას, რადგან უკრაინის სახალხო დეპუტატის, იგორ მოსიიჩუკის მკვლელობით ჩეჩნეთის პრეზიდენტი, რამზან კადიროვი იყო დაინტერესებული.

ინფორმაციას ამის შესახებ 112 Украина შს მინისტრის მრჩევლის, ივან ვარჩენკოზე დაყრდნობით ავრცელებს.

„ბევრი ვარიანტი შეიძლება იყოს. შემკვეთი ერთია - რუსეთის ფედერაცია. არის კონკრეტული მტკიცებულებები, რომლებსაც შეუძლია იმის დადასტურება, რომ კერძოდ, რამზან კადიროვი 2014 წელს პირდაპირ ამბობდა, რომ მოსიიჩუკისა და რამდენიმე მისი კოლეგის მოკვლას აპირებდა. გამოძიება ასევე განიხილავს სხვა ვერსიებსაც, მაგრამ ვფიქრობ, რომ საკმარისი მტკიცებულებითი საფუძველი გვაქვს, რომ რუსული შეკვეთის ვერსია ჩავთვალოთ პრიორიტეტულად. არ გამოვრიცხავ, რომ შემსრულებლები საკმაოდ მრავალფეროვანი აღმოჩნდნენ“, - განაცხადა ვარჩენკომ.

შეგახსენებთ, გუშინ კიევში, სოლომენსკის რაიონში არხ ესპრესო ტვ-ის შენობასთან აფეთქება მოხდა, რომლის შედეგად დაიღუპა 2 და დაშავდა 5 ადამიანი.

მომხდარს ტერაქტის კვალიფიკაცია მიენიჭა.

კადიროვისა და მოსიიჩუკის დაპირისპირება 2014 წელს დაიწყო. ინტერნეტში გავრცელდა ვიდეო, სადაც უკრაინელი დეპუტატი ამბობს „გაუმარჯოს დამოუკიდებელ იჩქერიას“ და ესვრის კადიროვის პორტრეტს. ამის შემდეგ ჩეჩნეთის პირველმა პირმა განაცხადა, რომ „მოსიიჩუკს მოკლავენ, თუკი მივაგნებთ“.

ანა მებურიშვილი