კომენტარი

რუსმა ტურისტებმა საქართველოს კანონი „ოკუპირებული ტერიტორიების შესახებ“უნდა გაითვალისწინონ - ზურაბ აბაშიძე

პრემიერ-მინისტრის სპეციალური წარმომადგენლის რუსეთთან ურთიერთობის საკითხებში ზურაბ აბაშიძის განცხადებით, რუსმა ტურისტებმა საქართველოს კანონი „ოკუპირებული ტერიტორიების შესახებ“, ბუნებრივია, უნდა გაითვალისწინონ.

ამის შესახებ აბაშიძემ რუსეთის როსტურიზმის მიერ გაკეთებული განცხადების კომენტირებიასს განაცხადა.

„უცხოელმა ტურისტებმა საქართველოში ყოფნისას, ბუნებრივია, უნდა გაითვალისწინონ ჩვენი კანონმდებლობა, მათ შორის კანონი „ოკუპირებული ტერიტორიების შესახებ“. ამა თუ იმ ქვეყნის ტურისტისათვის, რაიმე გამონაკლისი ამ თვალსაზრისით ვერ გაკეთდება. ჩვენ ვეთანხმებით აღნიშული კომენტარის იმ ნაწილს, სადაც საუბარია იმაზე, რომ საქართველოში მოგზაურობისას, რუსეთიდან ჩამოსულმა ტურისტებმა უნდა იქონიონ სამედიცინო დაზღვევა, რათა თავიდან ავიცილოთ სხვადასხვა გართულებები ამ კუთხით“,-აღნიშნა აბაშიძემ.

შეგახსენებთ, რომ რუსეთის ტურიზმის ფედერალური სააგენტო რუს ტურისტებს, რომლებიც საქართველოში აპირებს გამგზავრებას, აფრთხილებს, რომ საქართველოში „ოკუპირებული ტერიტორიების შესახებ“ კანონი მოქმედებს, რომელიც აფხაზეთისა და ე.წ სამხრეთ ოსეთის სტუმრობის გამო, ადამიანს ადმინისტრაციულ და სისხლის სამართლის პასუხისმგებობას აკისრებს.

სააგენტოს ინფორმაციითვე, რუსმა ტურისტებმა უნდა მიაქციონ ყურადღება იმ ფაქტს, რომ საქართველოში გამგზავრებისას მათ თან სამედიცინო დაზღვევა უნდა იქონიონ, რადგან საქართველოში სამედიცინო მომსახურება ძვირია.

მონიკა დავლიანიძე