კომენტარი

რუსეთთან მოლაპარაკებები ერთი პოლიტიკოსის საქმე არ უნდა იყოს, მასში ქვეყნის პოზიცია უნდა ჩანდეს - გიორგი მარგველაშვილი

საქართველოს პრეზიდენტი გიორგი მარგველაშვილი ტელეკომპანია „იბერიასთვის“ მიცემულ ინტერვიუში რუსეთთან შესაძლო მოლაპარაკებების შესახებ ისაუბრა.

მარგველაშვილის თქმით, რუსეთთან შეხვედრა ერთი კონკრეტული პოლიტიკოსის პრეროგატივა არ უნდა იყოს და მასში ქვეყნის პოზიცია უნდა ჩანდეს.

„თუმცა რეალური დღის წესრიგი ამ ეტაპამდე არ ყოფილა ჩამოყალიბებული, სადაც ჩვენ და რუსეთის ფედერაცია ერთმანეთის პირისპირ რეალური პრობლემების გადაწყვეტის თაობაზე შევხვდებოდით. ბუნებრივია, ასეთი შეხვედრა არ შეიძლება იყოს ერთი კონკრეტული პოლიტიკოსის შეხვედრა რუსულ მხარესთან. ეს უნდა იყოს კოორდინირებული, მომწიფებული და შეთანხმებული ქვეყნის პოზიცია“, - განაცხადა საქართველოს პრეზიდენტმა ტელეკომპანია „იბერიასთან“.

ჟურნალისტის შეკითხვაზე, რას მოიმოქმედებს პრეზიდენტი, თუ დადგება ორი ქვეყნის პირველი პირების შეხვედრის საკითხი, მარგველაშვილმა განაცხადა, რომ გამოსავალი მოლაპარაკებებების გზით უნდა მოიძებნოს.

„ჩემი პოზიციაა, რომ ყოველთვის უნდა გამოიყენო მოლაპარაკების მაგიდა. რა თქმა უნდა, შეხვედრა უნდა იყოს მომზადებული და მასში ყველა უწყება უნდა მუშაობდეს და აქტიურად იყოს ჩართული. და ჩვენ შეხვედრისკენ უნდა ვიყოთ ორიენტირებული. იმიტომ რომ პოლიტიკოსებს შორის მოლაპარაკების მაგიდა არის ის საშუალება, რომელიც შენ გაძლევს პრობლემების დაძლევის ან დაძლევის წინაპირობის შექმნის შესაძლებლობას და ამ თვალსაზრისით, რა თქმა უნდა, ჩვენ ძალიან კონცენტრირებულნი უნდა ვიყოთ ამ მიმართულებით“, - განაცხადა პრეზიდენტმა.

ტელეკომპანია „იბერიასთან“ პრეზიდენტმა ასევე ისაუბრა „გაზპრომზე“, გია ცერცვაძის საქმეზე , „რუსთავი 2-ზე“, ქვეყანაში არსებულ ეკონომიკურ მდგომარეობასა და ვიზალიბერალიზაციაზე.

ანა მებურიშვილი