კომენტარი

რუსეთთან მიმართებაში სიმწვავის შერბილება არ ნიშნავს ტერიტორიულ მთლიანობაზე უარის თქმას - გუგული მაღრაძე

საპარლამენტო უმრავლესობის წევრის, გუგული მაღრაძის განცხადებით, ევროპელი და ამერიკელი პარტნიორებისგან იყო რჩევა, რომ საქართველოს მოეხერხებინა და „რაღაცნაირად შეერბილებინა რუსეთთან მიმართებაში არსებული სიმწვავე“.

ამასთან, როგორც მაღრაძემ პრესკონფერენციაზე აღნიშნა, „სიმწვავის შერბილება არ ნიშნავს, რომ ჩვენ ოდესმე უარს ვიტყვით ჩვენს ტერიტორიულ მთლიანობაზე, ჩვენი მოქალაქეების დაცვაზე“.

„ეს სიმწვავე ოდნავ შერბილდა, თუმცა ამან უსაფრთხოების მეტი გარანტია, რა თქმა უნდა, არ მოგვცა. რუსეთი რჩება ერთ-ერთ მთავარ აგრესიულ მეზობლად, რადგან მას აქვს გარკვეული აგრესიული ზრახვები საქართველოსთან მიმართებაში. მე მომიწია ნაციონალური მოძრაობისთვის შემეხსენებინა, რომ ის პანიკური უარყოფითი რიტორიკა, რომელიც რუსეთის მიმართ იყო, არანაირი სარგებელი საქართველოსთვის, ჩვენი ქვეყნის მოქალქეებისთვის არ მოუტანია. პირიქით, კიდევ უფრო მეტად გაამწვავა ურთიერთობა. სწორედ ასეთ დროს, არა „გულის მოსაფხანად“ , ან რაიმე რიტორიკით, საკითხის გამწვავება არასწორია. საქმიდან გამომდინარე უნდა ვიმოქმედოთ, რათა ეს კონფლიქტი უარყოფითად არ ასიახოს ჩვენი ქვეყნის მოქალაქეების უსაფრთხოებასა და ტერიტორიულ მთლიანობაზე. ჩვენ არ ვფიქრობთ, რომ რაიმე ძალისმიერი მეთოდით შეიძლება ამ კონფლიქტის მოგვარება. რუსეთი ცდილობს გააფართოვოს თავისი გავლენა და ჩვენ ამას უნდა დავუპირისპიროთ ჩვენი საერთაშორისო თანამეგობრობის პასუხი, იმისთვის, რომ რუსთმა ეს იგრძნოს“,-განაცხადა მაღრაძემ.

მონიკა დავლაინიძე