მსოფლიო

რუსეთში სტალინის პოპულარობის რეიტინგი მაქსიმუმს მიაღწია ბოლო 16 წლის განმავლობაში

რუსული ანალიტიკური ცენტრის „ლევადა ცენტრის“ გამოკითხვით, რუსეთში იოსებ სტალინის პოპულარობის მაჩვენებელი 16 წლის განმავლოაბში მაქსიმუმს მიაღწია.

სტალინისადმი „აღფრთოვანებით“, „პატივისცემითა“ და „სიმპატიით“ გამოკითხულთა 46 %-ია განწყობილი, რაც 2006 წლის მონაცემებთან შედარებით 9%-ითაა გაზრდილი.

გაზრდილია იმ ადამიანთა რიცხვიც, რომლებისთვის სტალინის პოლიტიკა მიუღებელია. 2006 წელს თუკი სტალინისადმი უარყოფითი დამოკიდებულების მაჩვენებელი 17 % იყო, 2017 წლის დასაწყისში მათმა რაოდენობამ 21%-ს მიაღწია.

„ლევადა-ცენტრის“ დირექტორის მოადგილის, ალექსეი გრაჟდანკინის თქმით, სტალინის ფიგურა ბევრ მოქალაქეში ასოცირდება ქვეყანაში დამყარებულ წესრიგთან, რაც განაპირობებს მის მაღალ რეიტინგს.

„რაც უფრო მწვავდება მდგომარეობა ქვეყანაში, მით უფრო ითხოვს მოსახლეობა ხალხს „მყარი პოზიციებით“. ლიბერალურ დროს ასეთი განწყობები მცირდება, ახლა კი, დასავლეთთან კონფლიქტის პირობებსა და ახალი ცივი ომის დაწყების წინ იზრდება სიმპათია ასეთი ფიგურების მიმართ“, - თქვა გრაჟდანკინმა.

სტალინის გარდა მოსახლეობაში სიმპათიით სარგებლობენ ლეონიდ ბრეჟნევი (47%) და ვლადიმირ პუტინი (83%). ყველაზე არაპოპულარული მმართველები აღმოჩნდნენ ნიკიტა ხრუშჩოვი, ბორის ელცინი და მიხაილ გორბაჩოვი.

„ლევადა ცენტრის“ სოციოლოგიური გამოკითხვა რუსეთის 48 რეგიონში ჩატარდა 2017 წლის 20-23 იანვარს და მასში მონაწილეობა 1600-მა ადამიანმა მიიღო.

ანა მებურიშვილი