მსოფლიო

რუსეთში, შესაძლოა, რადიო თავისუფლების საქმიანობა შეზღუდონ

რუსეთში რადიო თავისუფლების რუსული სამსახურისა და ტელეარხ „Настоящее время“-ის საქმიანობა შეიძლება შეიზღუდოს. შესაბამისი გაფრთხილება მედიასაშუალებებმა რუსეთის იუსტიციის სამინისტროსგან მიიღეს. ეს მას შემდეგ მოხდა, რაც ოთხშაბათს რუსეთის სახელწმიფო სათათბირომ ერთხმად დაუჭირა მხარი კანონპროექტს, რომლითაც დაშვებულია უცხოეთის მედიასაშუალებების „უცხოეთის აგენტებად“ გამოცხადება.

უწყებას არ დაუზუსტებია, რა ზომებს მიმართავს, თუკი მედიასაშაულებების საქმიანობის შეზღუდვას გადაწყვეტს.

სათათბიროს მიერ მიღებული კანონპროექტის მიხედვით, ნებისმიერი უცხოური სტრუქტურა, რომელიც „ავრცელებს პირთა შეუზღუდავი წრისთვის ბეჭდურ, აუდიო-, აუდიოვიზუალურ და სხვა ტიპის მესიჯებსა და მასალებს“, შეიძლება გამოცხადდეს „უცხოეთის აგენტად“, თუკი უცხოეთიდან აფინანსებენ. ცვლილებები არ ვრცელდება რუსულ მედიასაშაულებებზე, მაშინაც კი, როცა მათი ერთ-ერთი მფლობელია უცხოელი.

რუსი დეპუტატების მტკიცებით, ეს კანონი არ შეუშლის ხელს უცხოური მედიის მუშაობას რუსეთში.

უცხოური მედიასაშუალებების მიმართ ზომების გამკაცრების ინიციატივა დაამტკიცეს კრემლის მიერ დაფინანსებული ტელეარხ Russia Today-ის განცხადების შემდეგ, რომ ის შეასრულებს აშშ-ის მთავრობის მოთხოვნას და „უცხოური აგენტის“ სტატუსით დაარეგისტრირებს თავის ადგილობრივ ფილიალს.

14 ნოემბერს აშშ-ის იუსტიციის სამინისტრომ გამოაქვეყნა მონაცემები Russia Today-ის რეგისტრაციის შესახებ. ვაშინგტონში აღნიშნავენ, რომ მათი კანონი „უცხოური აგენტების“ შესახებ მკვეთრად განსხვავდება რუსულისგან და არანაირად არ ზღუდავს ინფორმაციის თავისუფლებას.

ანა მებურიშვილი