მსოფლიო

რუსეთში საპენსიო რეფორმის წინააღმდეგ გამართულ აქციებზე 1000-ზე მეტი ადამიანი დააკავეს

გუშინ რუსეთში საპენსიო ასაკის გაზრდის წინააღმდეგ გამართულ აქციებზე 1000-ზე მეტი ადამიანი დააკავეს. ყველაზე მეტი დაკავებული დაფიქსირდა სანქტ-პეტერბურგში - 452 ადამიანი, ასევე ეკატერინბურგში - 183.

რუსეთის მხოლოდ 12 ქალაქში ხელისუფლებამ დაუშვა საპროტესტო აქციების ჩატარება, ხოლო ქვეყნის 59 ქალაქში გამოსვლები არასანქცირებული იყო. ოპოზიციონერ ალექსეი ნავალნის თანამოაზრემ, ლეონიდ ვოლკოვმა საკუთარ ტვიტერზე დაწერა, რომ გამოსვლებში 60-დან 80 000 ადამიანამდე მიიღო მონაწილეობა.

მოსკოვში, პუშკინის მოედანზე აქციის მონაწილეებმა მოიტანეს სამგლოვიარო გვირგვინი წარწერით „პენსია“ და სკანდირებდნენ, რომ „ეს არაა რეფორმა, ესაა ძარცვა“, „დააბრუნეთ ჩვენი ფული“, „მინდა, პენსიამდე ვიცოცხლო“ და „პუტინ, შენი თავისგან დაიწყე“. პოლიციასა და გამომსვლელთა შორის შეტაკებები მოხდა. სამართალდამცავებმა აქტივისტების წინააღმდეგ უხეში ძალა გამოიყენეს.

ყველაზე მძიმე შეტაკებები სანქტ-პეტერბურგში მოხდა. პოლიციამ ბავშვი დააკავა, რომელიც, რუსი კორესპოდენტის თქმით, 10 წლის აღმოჩნდა.

საპენსიო რეფორმის წინააღმდეგ საპროტესტო აქციების გამართვის იდეა ალექსეი ნავალნის ეკუთვნის. თვითონ მას გამოსვლებში მონაწილეობა არ მიუღია, რადგან 26 აგვისტოს ის დააკავეს და 30-დღიანი თავისუფლების აღკვეთა მიუსაჯეს ჯერ კიდევ იანვარში გამართული აქციის „ამომრჩეველთა გაფიცვის“ ჩატარების გამო.

აქციები დაემთხვა ადგილობრივ არჩევნებს.