კომენტარი

რუსეთის ფედერაცია დაშორებულია საერთაშორისო საზოგადოების პოზიციას და საერთაშორისო ნორმებს - მიხეილ ჯანელიძე

რუსეთის ფედერაციის განცხადება, რომ შესაძლოა დაფიქრდეს გააგრძელოს თუ არა ჟენევის ფორმატში მოლაპარაკებები, კიდევ ერთხელ მიუთითებს, რომ რუსეთის ფედერაცია დაშორებულია საერთაშორისო საზოგადოების პოზიციას და საერთაშორისო ნორმებს, - ასე პასუხობს საქართველოს საგარეო საქმეთა მინისტრი, მიხეილ ჯანელიძე რუსეთის ფედერაციის ჟენევის მოლაპარაკების საკითხზე გაკეთებულ განცხადებას.

საქართველოს საგარეო უწყების ხელმძღვანელის თქმით, საქართველო აგრძელებს საერთაშორისო სამართლის და პრინციპების შესაბამისად კონფლიქტის მშვიდობიანად დარეგულირების პროცესს და ხელისუფლება დგამს ყველა ნაბიჯს, რათა კონფლიქტის დარეგულირება მოხდეს.

“სამწუხაროდ, რუსეთის ფედერაციის ამ განცხადებით ვხედავთ იგივეს, რომ რუსეთი დაშორებულია საერთაშორისო საზოგადოების პოზიციას, საერთაშორისო სამართალს, ნორმებს და პრინციპებს.

საქართველო აგრძელებს საერთაშორისო სამართლის და პრინციპების შესაბამისად კონფლიქტის მშვიდობიან დარეგულირების პროცესს. ჩვენი მონაწილეობაც ჟენევის პროცეში ემსახურება კონსტრუქციულ მიდგომებს და საერთაშორისო სამართლის და ნორმების შესაბამისად კონფლიქტის დარეგულირებას”, - განაცხადა მიხეილ ჯანელიძემ.

ევროპის მინისტრთა კომიტეტის საბჭოს მიერ ხუთშაბათს მიღებულ გადაწყვეტილებას საქართველოსთან დაკავშირებით რუსეთი ტენდენციურს უწოდებს და აცხადებს, რომ აუცილებელია სერიოზულად დაფიქრება, გაგრძელდეს თუ არა ჟენევის შეხვედრები არსებულ ფორმატში.

ნინო ექვთიმიშვილი