მსოფლიო

რუსეთის 13 მოქალაქეს აშშ-ის საპრეზიდენტო არჩევნებში ჩარევისთვის ბრალი წაუყენეს

რუსეთის 13 მოქალაქეს აშშ-ის საპრეზიდენტო არჩევნებში ჩარევისთვის ბრალი წაუყენეს. ამის შესახებ სპეციალურმა პროკურორმა რობერტ მიულერმა განაცხადა.

საბრალდებო განაჩენი კოლუმბიის ოლქის სასამართლოს ნაფიცმა მსაჯულებმა გამოიტანეს.

ბრალდებულთა შორის არის ბიზნესმენი ევგენი პრიგოჟინი, რომელიც ვლადიმერ პუტინთან დაახლოებულ პირად ითვლება. სწორედ მას უკავშირებენ კომპანია ინტერნეტ კვლევების სააგენტოს, ანუ ე.წ. ტროლების ფაბრიკას, რომლის თანამშრომლებს თანხას უხდიან რუსეთის მთავრობის მხარდამჭერი კომენტარების გამოქვეყნებისთვის. გარდა ამისა, საქმეში ფიგურირებს პრიგოჟინის ორი კომპანია Concord Management andConsulting და Concord Catering, რომლებიც ასევე აფინანსებდნენ ორგანიზაციას.

იუსტიციის სამინისტროს ვებგვერდზე გამოქვეყნებულ დოკუმენტში ნათქვამია, რომ კომპანიამ ამერიკის პოლიტიკურ და საარჩევნო პროცესებში ჩარევა ჯერ კიდევ 2014 წელს დაიწყო.

განცხადების თანახმად, რუსი ტროლები ძირითადად ავრცელებდნენ შეურაცხმყოფელ ინფორმაციას დონალდ ტრამპის მთავარ ოპონენტზე, დემოკრატების კანდიდატ ჰილარი კლინტონზე. ისინი ავრცელებდნენ შეურაცხმყოფელ ინფორმაციას ასევე ისეთი კანდიდატების მიმართ, როგორებიც იყვნენ ტედ კრუზი და მარკო რუბიო. ტროლების მიზანი იყო, მხარი დაეჭირათ ბერნი სანდერსისთვის და რესპუბლიკელების კანდიდატისთვის, დონალდ ტრამპისთვის.

გარდა ამისა, სპეციალური პროკურორი მიულერი გააგრძელებს გამოძიებას. მან უნდა გაარკვიოს, უშლიდა თუ არა ხელს მართლმსაჯულებას აშშ-ის მოქმედი პრეზიდენტი დონალდ ტრამპი. გამოძიება რამდენიმე თვეს გასტანს.