მსოფლიო

რუსეთი სამხედრო ბიუჯეტს ამცირებს

რუსეთის თავდაცვის მინისტრის მოადგილის ტატიანა შვეცოვას განცხადებით, ქვეყნის სამხედრო ბიუჯეტი 2017 წელს 6%-ით მცირდება.

შვეცოვას თქმით, შემცირება თავდაცვითი უწყების ყველა სფეროს არ შეხებია. კერძოდ, უცვლელი რჩება სამხედრომოსამსახურეების ხელფასები, სამოქალაქო პერსონალის შრომის ანაზღაურება, დაზღვევები, კომპენსაციები და სამხედრო პენსიები.

„2017-2019 წლების ბიუჯეტის მომზადებისას, ფინანსთა სამინისტროს მიერ 2017 წელს ფედერალური ხარჯის შემცირება 6%-ით იქნა გათვალისწინებული. თუმცა, საბიუჯეტო ასიგნირების მოცულობის შემცირება არათანაბრად მოხდა და ყველა სფეროს არ შეხებია“,-აღნიშნა შვეცოვამ.

მისი თქმით, თავდაცვის სამინისტროს 2017 წლის ხარჯის შემცირება 100 მილიარდ რუბლით მოხდა.

ამასთან, რუსეთის თავდაცვის მინისტრის მიადგილის ინფორმაციით, 2016 წელს უწყებამ უძრავი ქონების გაქირავებასა და არალიკვიდური ქონების გაყიდვით, 41 მილიარდ რუბლზე მეტი გამოიმუშავა.

მონიკა დავლიანიძე