მსოფლიო

რუსეთი რასაც ეხება, ყველაფერს ნანგრევებად აქცევს, შეხედეთ აფხაზეთს, სამხრეთ ოსეთს - პეტრო პოროშენკო

უკრაინის პრეზიდენტის, პეტრო პოროშენკოს განცხადებით, რუსეთმა უკვე დაიწყო ჰიბრიდული ომი, რომელიც, შესაძლოა „მსოფლიო ჰიბრიდულ ომში“ გადაიზარდოს. ამის შესახებ მან მიუნჰენის უსაფრთხოების საერთაშორისო კონფერენციაზე თქვა.

პოროშენკომ რუსულ აგრესიაზე საუბრისას სამხრეთ ოსეთისა და აფხაზეთის ოკუპაციაც ახსენა.

„უნდა ვაღიაროთ, რომ ჰიბრიდული ომი, რომელსაც რუსეთი ახორციელებს, თანდათან ფართომასშტაბიანი მსოფლიო ჰიბრიდული ომი ხდება. კრემლმა არ იცის თავისი ფარული მიზნების საზღვრები. არ არსებობს სხვა ქვეყანა, რომელიც უკრაინაზე უკეთესად იცნობს მოსკოვის ჰიბრიდულ ტაქტიკას. ამიტომ მოვუწოდებ მთელს მსოფლიოს - უნდა შევეწინააღმდეგოთ რუსეთის მცდელობას, გაანადგუროს ჩვენი ერთიანობა და დემოკრატია.

ეს ომი სხვადასხვა დონეზე, ფრონტსა და სხვადასხვა სიჩქარით მიმდინარეობს. თუმცა, ბოროტება, რომელიც ამ ომის უკან დგას, ერთადერთია და ის კრემლში იმყოფება. რუსეთის აგრესიისთვის წინააღმდეგობის გაწევა არის ეგზისტენციალური გამოწვევა, რომელიც ჩვენს მომავალზე მოახდენს გავლენას.

პირველი, ჩვენ უნდა გავიგოთ, რა არის რუსული მშვიდობა. ამის მაგალითი ბევრია. რუსული მშვიდობა ყველაფერს, რასაც ეხება, ნანგრევებად აქცევს. შეხედეთ აფხაზეთს, სამხრეთ ოსეთს, დნესტრისპირეთს, ოკუპირებულ დონბასსა და ყირიმს. როგორც ჩანს, რუსული მშვიდობის დოქტრინის თანახმად, მთლიანად ევროპა უნდა გამოიყურებოდეს, როგორც კალინინგრადი ან ოკუპირებული დონეცკი“, -თქვა პოროშენკომ.

უკრაინის პრეზიდენტმა ყურადღება იმაზე გაამახვილა, რომ რუსეთი სხვადასხვა ქვეყანაში რადიკალურად განწყობილ, მარგინალ პარტიებს უჭერს მხარს. გარდა ამისა მან ახსენა რუსეთის მიერ დაქირავებული ინტერნეტ ტროლების საქმიანობა, რომლებიც ინტერნეტში ყალბი ამბების გავრცელებით არიან დაკავებული.