მსოფლიო

რუსეთი აშშ-წარმომადგენლობას 455 ადამიანამდე ამცირებს - კრემლის პასუხი სანქციების გამკაცრებას

„ამერიკული დიპლომატირური კორპუსის 755 წარმომადგენელი დატოვებს რუსეთს“, - ამის შესახებ რუსეთის პრეზიდენტმა ვლადიმირ პუტინმა ВГТРК-სთან ინტერვიუში განაცხადა.

რუსეთის პრეზიდენტის თქმით, შეზღუდვა ეხება როგორც დიპლომატებს, ასევე ტექნიკურ პერსონალს.

„ათასზე მეტი თანამშრომელი - დიპლომატიცა და ტექნიკური მუშაკიც - ამ დრომდე მუშაობს რუსეთში, აქედან 755-მა უნდა შეწყვიტოს თავისი საქმიანობა რუსეთის ფედერაციაში. ეს მგრძნობიარეა“, - განუცხადა პუტინმა რუსულ არხს.

აღნიშნული გადაწყვეტილება რუსეთმა ამერიკის კობგრესის ორივე პალატის მიერ დამტკიცებული დოკუმენტის საპასუხოდ მიიღო, რომელიც რუსეთის წინააღმდეგ სანქციებს ამკაცრებს. პუტინის თქმით, ამით ამერიკულმა მხარემ „გადადგა არაფრით პროვოცირებული ნაბიჯი რუსულ-ამერიკული ურთიერთობების გაუარესებისთვის“.

აშშ-ის დიპლომატიური კორპუსის შემცირების შედეგად რუსეთში 455 ადამიანი დარჩება. ზუსტად ამ რიცხვამდე იყო შემცირებული რუსეთის დიპლომატიური წარმომადგენლობა აშშ-ში.

„ჩვენ საკმაოდ დიდხანს ველოდით, რომ სიტუაცია უკეთესობისკენ შეიცვლებოდა, გვქონდა ამის იმედი, მაგრამ სიტუაცია არ შეცვლილა. როგორც ჩანს, ის მალე არ შეიცვლება. მე ვთვლი, რომ ვალდებულები ვართ, უპასუხოდ არაფერი არ დავტოვოთ“, - აღნიშნა პუტინმა.

შეზღუდვა პირველი სექტემბრისთვის ამოქმედდება.

რუსეთის პრეზიდენტის ინტერვიუს გამოეხმაურა აშშ-ის ყოფილი ელჩი რუსეთში მაიკლ მაკფოლი. მაკფოლის თქმით, მისი ელჩობის დროს ამერიკის საკონსულოში 755 თანამშრომელი არ მუშაობდა.

„დარწმუნებული ხართ, რომ 755 ამერიკელი დატოვებს? ამდენი ამერიკელი არ გვყავდა მთელ საკონსულოში, როცა მე იქ ვმუშაობდი“, - დაწერა რუსეთში ამერიკის ყოფილმა ელჩმა ტვიტერის საკუთარ გვერდზე.

აშშ-ის სახელმწიფო დეპარტმანეტის ოფიციალურმა წარმომადგენელმა ჰიზერ ნაუერტმა Washington Post-თან განაცხადა, „ეს სამწუხაროა და არაფრისგან გამოწვეული მოქმედებაა“.

„ჩვენ შევაფასებთ, რა გავლენას მოახდეს ეს შეზღუდვა და როგორ ვუპასუხოთ მას“, - განაცხადა ნაუერტმა.

ანა მებურიშვილი