მსოფლიო

რუსეთი 23 ბრიტანელ დიპლომატს აძევებს და ბრიტანულ საბჭოს ხურავს

ყოფილი რუსი ჯაშუშის, სერგეი სკრიპალის მოწამვლის საქმეზე ბრიტანეთის ზომების საპასუხოდ რუსეთი 23 ბრიტანელ დიპლომატს აძევებს ქვეყნიდან. რუსეთის საპრეზიდენტო არჩევნების წინა დღეს, რუსეთის საგარეო უწყებამ გაავრცელა განცხადება, რომლის მიხედვით, ბრიტანელ დიპლომატებს რუსეთის დასატოვებლად ერთი კვირა აქვთ.

გარდა ამისა, უქმდება ნებართვა სანქტ-პეტერბურგში დიდი ბრიტანეთის საკონსულოს გახსნის შესახებ.

რუსეთი ასევე კრძალავს ბრიტანული საბჭოს საქმიანობას ქვეყნის ტერიტორიაზე.

„რუსეთის ფედერაციაში ბრიტანული საბჭოს სტატუსის დაურეგულირებლობის გამო მისი საქმიანობა წყდება“, - წერია განცხადებაში.

ბრიტანული საბჭო საერთაშორისო საზოგადოებრივი ორგანიზაციაა, რომლის მიზანია, განათლების, კულტურისა და ხელოვნების სფეროებში თანამშრომლობის გაღრმავება დიდ ბრიტანეთსა და სხვა ქვეყნებს შორის.

რუსეთში ბრიტანული საბჭო 20 წელზე მეტი მუშაობდა. მისი საქმიანობა ხელს უწყობდა ორ ქვეყანას შორის კულტურ გაცვლას.

საბჭო შეიქმნა 1934 წელს სამეფო ქარტიით. დიდ ბრიტანეთში ის საქველმოქმედო ორგანიზაციას წარმოადგენს.

რუსეთის მთავარი სადაზვერვო სამმართველოს ყოფილი ოფიცერი სერგეი სკრიპალი და მისი ქალიშვილი 4 მარტს მოწამლეს ქალაქ სოლსბერში. გარდა ამისა დაშავდა 20-მდე სამოქალაქო პირი და პოლიციელი. როგორც დადგინდა, სკრიპალის მოსაწამლად რუსეთში გამზადებული ნერვო-პარალეპტიკური გაზი სახელწოდებით ნოვიჩოკი გამოიყენეს.

12 მარტს დიდი ბრიტანეთის პრემიერ-მინისტრმა ტერეზა მეიმ რუსეთს 24-საათიანი ულტიმატუმი წაუყენა, რათა მოსკოვს პასუხი გაეცა, როგორ მოხვდა ეს ნივთიერება ბრიტანეთის ტერიტორიაზე.

რუსეთმა ამ ულტიმატუმზე არ უპასუხა. ამის შემდეგ მეიმ თემთა პალატაში გამართულ ყოველკვირეულ შეხვედრაზე განაცხადა, რომ ქვეყნიდან გააძევებენ 23 რუს დიპლომატს და დიდი ბრიტანეთის დასატოვებლად მათ ერთი კვირა აქვთ.

გარდა ამისა, ლონდონი მოსკოვთან ყველა დონის ურთიერთობას წყვეტს.